Bıyl Quryq porty júkterdi jóneltýden 1,6 mlrd teńge tabys tapty
Qazir teńiz portynda 2 temirjol, 1 avtomobıl joly paromdyq kesheni jumys istep tur. Quryq portynyń parom kesheni zamanaýı ınfraqurylymdyq qondyrǵylarmen jabdyqtalǵan. Jalpy jobalyq qýattylyǵy – 6 mln tonna. 2019 jyldyń on bir aıyndaǵy kórsetkish boıynsha, 1,2 mıllıon tonnadan astam ártúrli júk jóneltilgen, 1,6 mlrd teńge tabys túsken. Júkterdiń 760 myń tonnasy ımporttalyp, 485 myń tonnasy eksportqa jóneltilgen.
Zamanaýı ınfraqurylymdarmen jabdyqtalǵan Táýelsiz Qazaqstannyń alǵashqy portynyń keleshekke jańa jospary kóp. Jýyrda ǵana «Kaspıı halyqaralyq tranzıttik marshrýty» qaýymdastyǵyna múshe bolǵan qazaqstandyq port óz áleýetin arttyrý úshin kórshi memlekettermen kelissózder júrgizip jatyr.
«Qazirgi ýaqytta qazaqstandyq astyq, kómir, munaı ónimderi, tyńaıtqyshtar, hımııalyq zattar Quryq portynyń parom kesheni arqyly eksporttalady. Port arqyly túrli jabdyqtar, elektronıka, toqyma, hımııalyq ónimder, metall buıymdary jáne taǵy basqalar ótedi. Tutastaı alǵanda, porttyń temirjol jáne avtomobıl ınfraqurylymy Quryq porty arqyly Ázerbaıjan men Grýzııaǵa, Túrkııamen Shyǵys Eýropaǵa jiberýge múmkindik beredi. Jalpy, munda parom kesheni iske qosylǵaly kiris 4 mıllıardtan astam teńgeni qurady»,- dedi porttyń bas dırektory Serik Jetpisbaıuly.
Azııa men Eýropany teńiz arqyly jalǵaıtyn sý jolynyń boıynda turǵan paromda 200-ge jýyq adam jumyspen qamtylǵan. Barlyq qyzmetkerler úshin qolaıly jaǵdaılar jasalǵan. Jaıly jataqhana, kúnine 3 ret tamaqtanatyn ashana jáne basketbol alańdary qarastyrylǵan.
Foto: kazakh-tv.kz