Bıyl Qurmanǵazy týraly mýltfılm jaryq kóredi

ASTANA. QazAqparat – Bıyl shilde aıynda dáýlesker kúıshi, kompozıtor Qurmanǵazy Saǵyrbaıuly týraly mýltfılm jaryq kórmek. Atalǵan týyndyny daıyndap jatqan mamandar arasynda qazirgi tańda jastarǵa anıme stılindegi sýretterimen tanymal L.Gýmılev atyndaǵy EUÝ-niń stýdenti Arýjan Unarbekova da bar. Osy oraıda, QazAqparat tilshisi sýretshi qyzben áńgimelesip, aldaǵy ýaqytta jaryq kóretin tyń týyndy týraly surap kórgen edi.

Arýjan Unarbekova Eýrazııa ulttyq ýnıversıtetindegi sáýlet-qurylys fakýltetiniń 5 kýrsynda oqıdy. Ol oqýdan bos ýaqytynda túrli keıipkerlerdiń sýretin anıme stılinde salýmen aınalysady. Onyń el Prezıdentiniń beınesin atalǵan stılde salýy, sondaı-aq qazaq halqynyń kórnekti tarıhı tulǵalaryn sýrettegen jumystary jastar arasynda asa tanymal. Búginde ol sýret salýmen qatar, mýltfılm jasaý isine de den qoıǵan.

«Qazir «Tasqyn» anımatsıalyqq stýdııasynda jumys isteımin. Bizdiń jobamyzdy mýltserıal dep atasa da bolady. Jalpy, mýltserıalymyz qazaq halqynyń ataqty kúıshileri, olardyń ómirbaıany jáne shyǵarmashylyq joly týraly baıandaıdy. Ár maýsymda jańa kúıshiler týraly aıtylady. Týyndynyń negizgi erekshelikteri - epızodtyń ishindegi kórsetiletin shaǵyn ángimelerdiń barlyǵy shynaıy kúılerdiń tarıhyna negizdelgen», - dedi Arýjan.

Qurmanǵazy týraly mýltfılm 13 serııadan turady. Arýjan Unarbekovanyń sózinshe, týyndydaǵy basty keıipkerdiń obrazy birneshe aıǵa sozylǵan irikteýden keıin tańdalǵan.

«Mýltfılmdegi keıipkerlerdiń qozǵalys anımatsııasy asa qıyn bolmaǵandyqtan, biz olardyń sýretin detaldi kórsetip, realızım tásilin qoldanyp jatyrmyz. Qurmanǵazynyń týyndydaǵy obrazy birneshe aı boıy tańdaldy. Basty keıipkerlerdi jasaǵan sýretshiler Qurmanǵazynyń referensterin jınap, úlgilerdiń ishinen eń qolaılysyn tańdap aldy. Epızodtardyń uzaqtyǵy ártúrli. Máselen, bir epızod 20 mınýttan assa, sonǵylary 15-10 mınýtpen shekteledi. 2023 jyldyń shildesine deıin mýltfılmniń birinshi maýsymy boıynsha jumystar aıaqtalyp, kórermenge jol tartady», - dep toqtaldy jas sýretshi.

Sonymen qosa, Arýjan Unarbekova ózge de jobalar boıynsha jumys jasap jatqanyn atap ótti.

«Kóptegen qyzyqty jobalardy shyǵarý josparlanýda. Qysqametrajdy fılmder men «Dala Sharqaýy» mýltserıalynyń ekinshi sezonynan basqa, tolyqmetrajdy kórkemfılmderdiń sıýjetteri daıyndalýda», - dep josparlarymen bólisti ol.

Eske sala keteıik, buǵan deıin QazAqparat redaktsııasy Arýjannyń Memleket basshysy Qasym-Jomart Toqaevtyń beınesin anıme stılinde salǵan sýretteri týraly jazǵan edi.

https://kaz.inform.kz/news/zhastar-kasym-zhomart-tokaevty-zhaksy-koredi-prezidentti-anime-stilinde-salgan-zhas-suretshi_a4002725