Bıyl qýaty 104,8 MVt 4 jańartylatyn elektr stansasy qosylady

NUR-SULTAN. QazAqparat - Bıyl qýaty 104,8 MVt 4 jańartylatyn elektr stansasy iske qosylady. Bul týraly búgin Úkimet otyrysynda elimizdiń 10 aıdaǵy áleýmettik-ekonomıkalyq damý qorytyndysy jaıynda baıandaǵan QR Energetıka birinshi vıtse-mınıstri Mahambet Dosmuhambetov aıtty, dep habarlaıdy QazAqparat tilshisi.

«Elektr energııasyn óndirý sektorynda osy jyldyń 10 aıy ishinde qýaty 402 MVt bolatyn 14 jańartylatyn elektr energııasy nysany iske qosyldy. Jyldyń sońyna deıin qýaty 104,8 MVt jańadan 4 jańartylatyn elektr energııasy nysany iske qosylatyn bolady», - dedi ol.

Onyń dereginshe, jańartylatyn energııa kóziniń elektr energııasyn óndirý kólemi osy jyldyń 10 aıy ishinde 1,7 mlrd kVt/saǵ qurady. Bul 2018 jyldyń sáıkes kezeńine qaraǵanda 65 paıyzǵa kóp. Elektr energııasyn óndirý kólemindegi jańartylatyn elektr energııasynyń úlesi 2 paıyzǵa jetip otyr .

«Jalpy, respýblıka boıynsha 2018 jylmen salystyrǵanda jańartylatyn energııa kózi nysandarynyń sany 2019 jyly 20 nysanǵa, ıaǵnı 67-den 87-ge, JEK nysandarynyń jıyntyq qýaty 1,9 esege, 2018 jylǵy 537 MVt-tan 2019 jyly 1042 MVt-qa deıin artty», - dedi Mahambet Dosmuhambetov.