Bıyl qostanaılyq dıqandar 4 mln tonna astyq bastyrdy

NUR-SULTAN. QazAqparat - Qostanaı oblysynda bıyl 4 mln tonna astyq jınaldy. Bul týraly búgin Ortalyq kommýnıkatsııalar qyzmetindegi baspasóz máslıhatynda óńir ákimi Arhımed Muhambetov aıtty, dep habarlaıdy QazAqparat tilshisi.

«Aýyl sharýashylyǵy oblys ekonomıkasynyń ekinshi bazalyq baǵyty sanalady. Onyń jalpy óńirlik ónimdegi úlesi 11,2 paıyzdy quraıdy. Salada 126 myńnan astam adam jumys isteıdi. Bıyl jalpy egistik alqabynyń aýmaǵy 5,3 mln gektardy, onyń ishinde astyq jáne dándi-burshaq daqyldary 4,1mln gektardy qurady. Egistik alqaptary qurylymyn ártaraptandyrýdy jalǵastyrý aıasynda maıly daqyldar alqaby 640,5 myń gektarǵa ulǵaıtyldy. Bul 2019 jylǵy kórsetkishten 132,5 myń gektarǵa kóp. Jalpy bastyrylǵan astyq kólemi 4 mln tonnany qurap, ónimdilik gektaryna 10,2 tsentnerden boldy», - dedi oblys basshysy.

Sonymen qatar, ol bıyl memlekettik qoldaý sharalarymen negizgi aýyl sharýashylyǵy daqyldary jáne mal sharýashylyǵy qamtylǵanyn aıtty. Agroónerkásip keshenin damytýǵa 38,4 mlrd teńge jumsalǵanyn atap ótti.

«Qaıta óńdeýshi kásiporyndar 202 mlrd teńgege taýarlyq ónim óndirdi. ósim 24 paıyzdy quraıdy. Bul rette sary maı óndirý 19, irimshik pen súbe 44, sút jáne qoıýlandyrylǵan sút 49, shujyq ónimderi 10, konserviler 84, un 18, jarma 27, ósimdik maıy 17 paıyzǵa artty. Et óndirisi 6,3 paıyzǵa jáne sút 1,7 paıyzǵa ósti. Jyl basynan beri ósimdik maıy eksporty 4 ese artyp, ún eksporty 20 paıyzǵa ósti. 800 myń tonna astyq pen 572 myń tonna un eksportqa shyǵaryldy», - dedi Arhımed Muhambetov.