Bıyl Qostanaıǵa 300 otbasy kóship keledi
QOSTANAI. QazAqparat - Nátıjeli jumyspen qamtý jáne jappaı kásipkerlikti damytý baǵdarlamalary boıynsha byltyr Qostanaı oblysyna 30 otbasy qonys aýdardy, dep habarlaıdy QazAqparat.
Jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenova aıtqandaı, byltyr oblysqa 109 oralman otbasy kóship kelgen.
«Olardyń jolaqysy, turǵyn úı, kommýnaldyq tólemderine memleketten sýbsıdııa bólindi. Byltyr atalǵan qajettilikterge 50,7 mln teńge jumsaldy. Jumyspen qamtýdy úılestirý baǵdarlamasyna qatysqandardyń barlyǵy áleýmettik kelisim-sharttarǵa qol qoıdy. Turaqty jumys oryndarymen qamtamasyz etildi», - dedi Ábenova.
Belgili bolǵandaı, bıyl Qostanaıǵa eldiń basqa óńirlerinen 272 otbasy qonys aýdarmaq. Buǵan qosa 25 oralman otbasy astyqty aımaqqa bet burady.
«Qazir qostanaılyq delegatsııa Mańǵystaý oblysyndaǵy bos oryndar jármeńkesine qatysýda. Sonymen qatar naýryz-sáýir aılarynda basqa oblystarda ótetin jármeńkelerge qatysyp, Qostanaıǵa kelýge qyzyǵýshylyq tanytqan mamandardy izdeımiz. Bıyl oblys boıynsha nátıjeli jumyspen qamtý jáne jappaı kásipkerlikti damytý baǵdarlamalaryna 1 mlrd teńgeden astam qarajat qarastyrylǵan», - dep túsindirdi basqarma basshysy.
