Bıyl Qostanaıda 10 myńǵa jýyq jumys orny ashylady
QOSTANAI. QazAqparat - Bıyl Qostanaıǵa eldiń basqa óńirlerinen 300-deı otbasy qonys aýdarady. Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenova málimdedi, dep habarlaıdy QazAqparat.
Basqarma basshysy bıyl oblysqa jumys kúshi mol aımaqtardan 272 otbasy (1118 adam) jáne 25 oralman otbasy (125 adam) kóship keletinin aıtty. Búgingi tańda qandastardy qabyldaý kvotasy bólindi, olarǵa tıisti járdem jasalmaq.
«Jumys oryndaryn qurý, sonyń ishinde turaqty eńbek etýge kúsh jumsaý únemi nazarymyzda. Bıylǵa josparlanǵan on myńnan astam jumys ornyn qurý 18,3% oryndalyp otyr. Úkimetpen jasalǵan memorandým boıynsha 7,5 myńnan asa turaqty jumys ornyn qurý josparlanǵan, qazir oryndalǵany - 1110 oryn. Al halyqty keshendi jospar aıasynda jumysqa tartý jaǵynan Rýdnyı, Arqalyq qalalary men Meńdiqara aýdany kósh bastap tur», - dedi G.Ábenova.
Qazirgi tańda turǵyndardy memleket tarapynan júzege asyrylyp jatqan jobalar boıynsha jumysqa ornalastyrý mańyzdy másele bolyp otyr. Bıyl bul baǵyt boıynsha 266 joba arqyly 1114 adamdy jumyspen qamtý josparlanǵan bolsa, ázirge úsh adam ǵana jumysqa ornalasqan. Basqarma basshysy muny memlekettik satyp alý baıqaýlarynyń endi ǵana júrgizilip jatqanymen túsindirdi.
Al oblys ákimi Arhımed Muhambetov turǵyndardy turaqty jumysqa ornalastyrý máselelerine shıraı túsýdi tapsyrdy.
«7,5 myń adamdy turaqty jumysqa ornalastyrý ońaı emes. Sondyqtan jan-jaqty múmkindikterdi qarastyryńyzdar. Qurylys, jol, basqa da jyldyń jyly mezgilinde oryndalatyn merdigerlik jumystar bar. Olardy turaqty dep aıtýǵa kelmeıdi, ýaqytsha jumys. Shaǵyn jáne orta kásipkerlik, ónerkásip, aýyl sharýashylyǵy salalaryn turaqty dep tolyq aıta alamyz. Mine, osy jaǵyna mán berińizder», - dedi A.Muhambetov.
Belgili bolǵandaı, bıyl nátıjeli jumyspen qamtý baǵdarlamasyna qatysýǵa 8,5 myńnan astam adam ótinish bildirdi. Baǵdarlamanyń birinshi baǵyty boıynsha myń jarymnan asa adam qysqa merzimdi oqý kýrstaryn meńgerip shyǵýǵa kirisip ketken. Endigi másele - oqýyn aıaqtaǵandardy jumysqa ornalastyrý. Al bıyl Altynsarın, Amankeldi, Jankeldın jáne Naýyrzym aýdandarynda traktorshy, dánekerleýshi, aspazdyq mamandyqtary boıynsha 85 adamdy mobıldi oqý ortalyqtary arqyly daıarlaý qarastyrylǵan. Qazir olardyń 42-si kýrsty aıaqtady.
