Bıyl Qostanaı oblysynda joldardy kútip ustaýǵa 1,5 mlrd teńge bólingen

QOSTANAI. QazAqparat – Bıyl Qostanaı oblysynda jergilikti mańyzy bar avtomobıl joldaryn qys mezgilinde kútip ustaýǵa 1,5 mlrd teńge bólindi. Bul týraly óńir ákimi Arhımed Muhambetov áleýmettik jelidegi jeke paraqshasynda jazdy, dep habarlaıdy QazAqparat tilshisi.

«Jergilikti mańyzy bar avtomobıl joldaryn qysqy kútip ustaýǵa bıyl oblystyq bıýdjetten 1,5 mlrd teńge bólindi. Jol basqarmasy 2022 jyldyń sońyna deıin 11-shi merdigerlik jol uıymdarymen oblystyq mańyzy bar avtojoldardy kútip ustaý jóninde sharttar jasasty. Oblysta jergilikti jeliniń avtojoldaryna qyzmet kórsetý úshin barlyǵy 269 birlik qar tazalaý tehnıkasy bar.

Ári qaraı selektorlyq keńeste «Aýyl – el besigi» jobasynyń iske asyrylý barysyn qarastyrdyq. Jalpy, 2019-2021 jyldar aralyǵynda «Aýyl – el besigi» jobasy aıasynda 142,6 myń adam turatyn 35 aýylda 14,4 mlrd teńgege 214 joba iske asyryldy. Bıyl oblystyń 38 tirek jáne spýtnıktik aýyldarynda 80 jobany iske asyrýǵa 7 mlrd 543 mln teńge qarastyrylyp otyr. Búgingi tańda 65 joba aıaqtaldy, 8 joba aıaqtalý satysynda. Taǵy 3 joba jyl sońyna deıin aıaqtalady. Al qalǵan jobalar kelesi jylǵa aýysady», - dep jazdy oblys ákimi Instagram-paraqshasynda.

Óńir basshysynyń málimetinshe, selektorlyq keńeste jylytý maýsymyna qatysty máseleler de talqylanǵan. Búginde oblystaǵy barlyq nysandar jylýmen jabdyqtaý júıesine qosylǵan. Qarasha aıyndaǵy derekke sáıkes, óńirde 401,8 myń tonna kómir qory daıyndalǵan.