Bıyl Qostanaı oblysynda 547 mlrd teńgeniń ónimi óndirildi
QOSTANAI. QazAqparat - Qostanaı oblysynda ótken jylmen salystyrǵanda bıyl óndiristik ónim úshten bir esege artyq shyǵarylǵan. Bul týraly oblystyq kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Roza Gorıannaıa málim etti, dep habarlaıdy QazAqparat tilshisi.
Qostanaı oblysynda 700 kásiporyn óndiristik ónim shyǵarýmen aınalysady. Munda barlyǵy 45 myń adam eńbektenedi.
«2017 jyldyń qańtar-qyrkúıek aılary aralyǵynda oblysta 547 mlrd teńgeniń ónimi óndirildi. Bul byltyrǵy jylmen salystyrǵanda 29%-ke kóp. Mundaǵy fızıkalyq kólemniń ındeksi - 104%, atalǵan kórsetkish boıynsha Qostanaı oblysy respýblıkada 9-oryn alady. Ónimniń 52%-i óńdeýshi salaǵa tıesili. Al taý-ken óndirisiniń ónimderi 41%-dy quraıdy»,- dedi Gorıannaıa.
Bul rette oblys ekonomıkasynyń ilgerileýine eki iri kompanııa - «Sokolov-Sarybaı» ken óndirý kombınaty men «SaryarqaAvtoProm» JShS aıtarlyqtaı úles qosqan. Máselen, «SaryarqaAvtoProm» kásiporny 2010 jyldan beri 31 myń avtokólik qurastyrǵan.
«Búginde «SaryarqaAvtoProm» avtokóliktiń 57 úlgisin shyǵarady. Jyl aıaǵyna deıin 6 myń avtokólik qurastyrý josparlanǵan. 2016 jyly kásiporyn 12 elektromobıldi satylymǵa shyǵardy», - dep atap ótti Roza Gorıannaıa.
Seriktestik osy jyly ónimderin birneshe elge eksportqa shyǵarǵan. Qostanaılyq mashına qurastyrýshylar 55 JAC avtokóligin Tájikstanǵa, taǵy 21 IVECO kóligin Reseıge jiberdi.
