Bıyl Qostanaı oblysyna ońtústikten 445 adam kóship keledi

QOSTANAI.QazAqparat – Bıyl Qostanaı oblysyna 445 adam kóship keledi. Olarmen áleýmettik kelisimshart jasalady, dep habarlaıdy QazAqparat oblystyq jumyspen qamtýdy úılestirý jáne áleýmettik baǵdarlamalar basqarmasyna silteme jasap.

Turǵyndar tyǵyz ornalasqan aımaqtardan jumys kúshi az óńirlerge azamattardy kóshirý jumysy bıyl da jalǵasady.

Osy jyly Qostanaı oblysyna 445 adam qonys aýdaramaq. Alaıda ázirge olardyń naqty qandaı aýdan-qalalarǵa baratyny belgisiz.

Sebebi kóship kelýshilerdiń kvotasy áli bekitilgen joq.

Qostanaı oblysynyń atqarýshy bıligi qonys aýdarýshylarǵa jan-jaqty qoldaý kórsetedi. Aldymen, otaǵasy men árbir otbasy múshesine 35 AEK (102 myń teńge) kóleminde sýbsıdııa qarastyrylǵan.

Sondaı-aq jyl ishinde aı saıyn olarǵa turǵyn úıdi jalǵa alý jáne kommýnaldyq qyzmetterdi tóleý shyǵyndary óteledi. Qalaǵa kóshkender úshin – otbasyndaǵy adam sanyna baılanysty 30 AEK deıin (87 myń 510 teńge), aýyldarda 21 AEK deıin (61 myń 257 teńge) beriledi.

Óńirge kelgen azamattarǵa 525,1 myńnan 1,1 mıllıon teńgege deıin birjolǵy qarajat beriledi. Bul qarjyny turǵyn úı satyp alýǵa paıdalanýǵa quqyly.

Basty shart – ákimdikpen aldyn ala satý-satyp alý shartyn jasaý.

Kómektiń kelesi túri – jumys máselesi. Kóship kelýshilerge jergilikti ákimdik turaqty jumys taýyp berýge mindetti.

Tilek bildirýshiler «Bastaý-Bıznes» jobasy sheńberinde qaıta daıarlaý jáne oqytý kýrstarynan óte alady, sondaı-aq óz isin ashýǵa grant alady.

Sýbsıdııa qonys aýdarýshy áleýmettik kelisimshartqa qol qoıǵannan keıin ǵana tólenedi.

Qujatta onyń jumysqa ornalasýy jáne aımaqta 5 jyl turýy kerektigi jazylǵan. Sharttardy oryndamaǵandar tólemderdi tolyq kólemde qaıtarýy tıis.

Aıta keterligi, 2016 jyly Qostanaıǵa basqa oblystardan – 19, 2017 jyly 30 ǵana otbasy qonys aýdarǵan.

2018 jyly bul kórsetkish 10 esege ulǵaıdy. Al 2020 jyly Qostanaı oblysy 272 otbasyn qabyldady.