Bıyl Qostanaı oblysyna 180 mlrd teńge ınvestıtsııa quıylǵan
Arhımed Muhambetov óziniń baıandamasynda jyldy qorytyndylap, jetken jetistikterge toqtaldy.
«Bizdiń oblys Elbasynyń ár bastamasyna úles qosýdy áli de jalǵastyratyn bolady. Óńirde memlekettik baǵdarlamalar joǵary dárejede júzege asyrylyp, ındýstrıaldy-ınnovatsııalyq nysandar paıdalanýǵa berildi. Mashına jasaý, jańa tehnologııalardy qoldaný, óńdeýshi ónerkásip órge basty. «Qazaqstannyń qasıetti jerleriniń kartasy» jobasy boıynsha Qostanaı oblysynda tarıhı-mádenı murany qasterleýge baǵyttalǵan aýqymdy sharalar júzege asyryldy. Máselen, ǵasyrǵa jýyq jat elde saqtalǵan, Keıki batyr babamyzdyń bas súıegi elge qaıtarylyp, batyr rýhyna laıyqty, sáýletti kesene ornatyldy», - dedi aımaq basshysy.
Bıyl Qostanaıda «Týǵan jer» jobasy sheńberinde jalpy quny 3,0 mlrd teńgeden astam júzdegen joba iske asyryldy. Qalalar men aýdandarda jergilikti kásipkerler tarapynan áleýmettik nysandar salý, joldardy jóndeý, eldi mekenderdi abattandyrý jumystary keńinen qoldaý tapty.
«Óndiristik sala 4,1%-ǵa, aýyl sharýashylyǵy taýarlary ósimi 3,5%-ǵa eselendi. Indýstrııa 4.0 boıynsha taý-ken óndirisi salasynda da aıtýǵa turarlyq jetistikter bar. Máselen, «Sokolov-Sarybaı» ken baıytý ornynda «aqyldy kenish» jobasy qolǵa alyndy. Indýstrıalandyrýdyń ekinshi bes jyldyǵynda 25 iri joba iske asyrylady. Onyń quny - 628 mlrd teńge. Barlyǵy 6 myń jumys orny ashylady», - dep málimdedi Arhımed Muhambetov.
Oblys ákiminiń aıtýynsha, 2017 jyly Qostanaı oblysyna 180 mlrd teńge ınvestıtsııa quıylǵan. Bul kórsetkish byltyrǵy jylmen salystyrǵanda 21,4 mlrd teńgege artyq.
Jıyn barysynda oblys ákimi bıyl úzdik nátıje kórsetken sala ókilderin marapattady. Olardyń arasynda Toqtarbaı Qadambaev, Bazyl Jaqypov, Arýna Jaqsaǵulova, Sergeı Harchenko, Elena Tsventýh, Talǵat Karbozov syndy tulǵalar bar. Merekelik kesh teatrlandyrǵan kórinister, án-bımen árlendi.
