Bıyl Qostanaı oblysyna 113 mlrd teńge ınvestıtsııa quıylǵan
QOSTANAI. QazAqparat - Qostanaıdaǵy halyqaralyq ınvestıtsııalyq forým aımaqtyq týrıstik kórmege ulasty. Onda qazaqstandyq kásipkerler ózderiniń ozyq jobalaryn tanystyrdy, dep habarlaıdy QazAqparat tilshisi.
Oblys ortalyǵynda ótip jatqan "Kostanay Invest 2017" ınvestıtsııalyq forým aıasynda kásipkerler aımaqtyq týrıstik kórmege at basyn burdy. Oǵan QR Investıtsııa jáne damý vıtse-mınıstri Erlan Qaıyrov, QR Mádenıet jáne sport vıtse-mınıstri Asqar Batalov, Qazaqstan damý banki basqarmasynyń tóraǵasy Bolat Jámishev, Qostanaı oblysynyń ákimi Arhımed Muhambetov qatysty.
«Barynsha qolaıly ınvestıtsııalyq klımatty qalyptastyrý úshin Elbasy Nursultan Nazarbaev júktegen barlyq tapsyrmalardy oryndap jatyrmyz. Qazaqstan Ekonomıkalyq yntymaqtastyq jáne damý uıymyna múshe 48 eldiń qatarynda. Bul degenińiz elimizdiń ekonomıka jaǵynan damyǵandyǵynyń irgeli kórsetkishi. Sol sebepti Qostanaı oblysy ǵana emes, barlyq óńirde ınvestıtsııalyq mıkroklımat qalyptasýy tıis», - dedi QR Investıtsııa jáne damý vıtse-mınıstri Erlan Qaıyrov.
Vıtse-mınıstrdiń aıtýynsha, 2018-2022 jyldarǵa arnalǵan ulttyq ınvestıtsııalyq strategııa eki baǵytta júrgiziledi. Birinshiden, Qazaqstannyń ınvestıtsııalyq ahýalyn jaqsartý: ınvestıtsııalyq saıasattyń ashyqtyǵy men boljamdylyǵyn arttyrý, vızalyq jáne kóshi-qon rejimderin jetildirý sharalary, ınvestorlardyń quqyqtaryn qorǵaý salasynda zańnamany jetildirý. Ekinshiden, tıimdi operatsııalyq sharalardy júzege asyrý jáne ınvestıtsııalar tartý úshin jańa tásilder engizý.
Qazaqstannyń Úshinshi jańǵyrýy basym baǵyttarynyń biri týrızmdi damytý desek, bul sala boıynsha oblysta ekotýrızm men emdeý-saýyqtyrý keshenderi ozyq tur.
«Jyl basynan beri Qostanaı oblysyna 113 mlrd teńge ınvestıtsııa quıylǵan. Bul ótken jylmen salystyrǵanda 11,5 mlrd teńgege kóp. Ústimizdegi jyldyń 8 aıynda ónim óńdeýshi salaǵa jumsalǵan qarjy 2,2 esege ósken. Búgingi kúni Qostanaı óńirine kelgen ınvestorlarǵa barlyq jaǵdaıdy jasaýǵa ázirmiz. Búkilálemdik bank sarapshylarynyń qatysýymen bizdiń oblysta «2018-2022 jyldarǵa arnalǵan ınvestıtsııa tartýdyń jol kartasy» baǵdarlamasynyń pılottyq jobasy jasaldy», - dep atap ótti Qostanaı oblysy ákiminiń orynbasary Meıirjan Myrzalıev.
Meıirjan Myrzalıevtiń sózine súıensek, Qostanaı oblysy ınvestorlarǵa 16 týrızm nysanyn usynbaq. Osy rette mýnıtsıpaldyq servıs, qala ınfraqurylymy, jol jáne logıstıka máseleleri basty nazarǵa alynady. Qazirdiń ózinde Naýyrzym qoryǵy men «Sosnovyı bor» saýyqtyrý kesheni týrıster suranysyna ıe. 
Týrıstik kórme barysynda ataqty «Ývıldy» shıpajaıy, Soltústik Qazaqstan oblysyndaǵy «Botaı» turaǵy, astanalyq «Ásel» týrfırmasy ózderiniń múmkindikterin pash etti. Sondaı-aq, qostanaılyq qolóner sheberleri men zergerler meımandarǵa ózderiniń jasaǵan buıymdaryn usyndy.
«Maǵan aǵashtan jasalǵan buıymdar unady. Bizdiń elde bul óner damymaǵan. Bolashaqta qostanaılyq sheberlermen birigip, joba jasaǵymyz keledi. Ásirese, turmysta qoldanylatyn zattar ótimdi bolar edi», - dedi polshalyq kásipker Matıash Zelınskıı.
Kórme aıaqtalǵan soń qatysýshylar plenarlyq otyrysqa kirdi. Munda 200 mlrd teńge bolatyn 26 memorandýmǵa qol qoıyldy. Endeshe, shet elderden ınvestıtsııa tartýǵa qolaıly aımaq sanalatyn Qostanaı oblysy óziniń ekonomıkalyq áleýetin taǵy bir kórsetti.
Batyr Jolaıuly
