Bıyl Qorǵaljyn qoryǵyna 2,5 myńnan astam týrıst keldi

KÓKShETAÝ. QazAqparat - Qorǵaljyn aýdanynyń týrızmdi damytýǵa áleýeti jetedi. Qarasań kóz toımaıtyn kesteli kórkem tabıǵat aıasy ekologııalyq týrızmniń biregeı oshaqtaryn ashýǵa suranyp-aq tur. Qorǵaljyn qoryǵy men atalmysh aýdandy týrıster úshin tartymdy etý turǵysyndaǵy jumystar týraly Óńirlik kommýnıkatsııalar qyzmetinde ótken brıfıngte Aqmola oblystyq týrızm basqarmasynyń basshysy Danııar Idııatov aıtyp berdi, dep habarlaıdy QazAqparat tilshisi.

Basqarma basshysynyń aıtýynsha, Qorǵaljyn aýdanynyń aýmaǵynda ıÝNESKO-nyń tabıǵı muralarynyń tizimine engen Qorǵaljyn qoryǵy bar. Atalmysh tabıǵat qorǵaý aýmaǵynyń basty ereksheligi - qustardyń jahandyq mıgratsııa baǵytynyń túıisken jerinde ornalasýy. Bul - Qazaqstandaǵy jáne búkil Eýrazııa qurlyǵyndaǵy jyl qustarynyń mańyzdy sýly-batpaqty jeri. Qoryqtyń basty baılyǵy da - osy qustar. 

«Qoryqta elimizdiń Qyzyl kitabyna engizilgen qustyń 32 túri kezdesedi. Osy ornıfaýna arqyly qoryq álemge áıgili bolyp otyr. 1976 jyly Teńiz-Qorǵaljyn kólder júıesi Ramsar konventsııasyna sáıkes, álemdik mańyzdaǵy sýly-batpaqty jerler qataryna jatqyzylǵan. Teńiz kóli - álemniń naǵyz biregeı kólderi kiretin «Tiri kólder» halyqaralyq jelisine qosylǵan elimizdegi jalǵyz kól. 2007 jyly atalmysh tabıǵat qorǵaý aýmaǵynyń qoryqtyq kólderi «Álemniń basty ornıtologııalyq aýmaqtary» tizimine qosylǵan. 2012 jyly ıÝNESKO atalmysh qoryqtyń Qazaqstandaǵy alǵashqy bıosferalyq rezervat ekenin moıyndady», - dedi D.Idııatov. 

Sonymen qatar, ol Qorǵaljyn aýylynda 6 qonaqúı baryn, onda bir mezette 100 adam qabyldaýǵa bolatynyn atap ótti. Qorǵaljyn qoryǵynyń ákimshilik ǵımaratynda 2009 jyldan beri zamanaýı vızıt-ortalyq jumys isteıdi. Oǵan jyl saıyn 3 myńnan astam adam kelip-ketedi. Bıylǵy toǵyz aıda vızıt-ortalyqqa 2512 adam kelip, 453 saıahat uıymdastyrylǵan. Al, qoryq aýmaǵynda barlyǵy 140 saıahat uıymdastyryldy.

«Statıstıkalyq derekterge qaraǵanda, aǵymdaǵy jyldyń 6 aıynda kórsetilgen qyzmettiń kólemi 2508,2 mıllıon teńgeni qurady. Barlyǵy 142 myń adamǵa qyzmet kórsetilgen. Bıyldan bastap elimizde jalǵyz ornıtologııalyq ortalyq jumys isteı bastady. Buǵan qosa, týrısterdi tartý maqsatynda «Qoqıqaz» respýblıkalyq festıvali, Nura ózeninde raftıng jáne sporttyq balyq aýlaý sııaqty sharalar ótkizilip keledi. Jalpy, ornıtofaýnaǵa baı Qorǵaljyn aýdanynyń týrızmdi damytý áleýeti zor. Bul baǵytta 2019-2021 jyldarǵa arnalǵan Jol kartasy ázirlenýde», - dep qorytyndylady D.Idııatov.