Bıyl kómir tapshylyǵy bolmaıdy - Almaty ákimdigi

ALMATY. QazAqparat -  Almaty ákimdigi bıyl jylý berý maýsymynda kómir tapshylyǵy bolmaıdy dep sendirdi, dep habarlaıdy QazAqparat tilshisi.

Sheneýnikterdiń aıtýynsha, bıyl qalany jylytýǵa jektilikti kómir qory bar.

Qalalyq kásipkerlik jáne ındýstrıaldy-ınnovatsııalyq damý basqarmasynyń bólim basshysy Erlan Omarovtyń aıtýynsha, bir táýlik ishinde 650 tonnaǵa deıin kómir satylyp jatyr.

«2018 jyldyń mamyrynan bastap búginge deıin 53,8 myń tonna kómir jetkizildi. Qalamyzdyń 75 paıyzyna kómir berildi. Kómir ár 2 kún saıyn keledi. Al qazan aıynda 46,5 myń tonna nemese 665 vagon kómir jetkizý josparlanyp otyr», - deıdi Erlan Omarov.

Almatyda 4831 úıde gaz joq. Bıyl osy úılerdi jylytýǵa  50 myń tonna kómir qajet.

«Qala bazasyndaǵy kómirdiń 80 paıyzy Almaty oblysynyń turǵyndaryna satylady. Sebebi, oblystyq bazalar aýyldardan alys ornalasqan. Almaty tabıǵı monopolııalardy retteý, básekelestikti qorǵaý jáne tutynýshylardyń quqyqtaryn qorǵaý departamentimen birlese otyryp, jylytý maýsymyna daıyndyq jáne rezervtegi kómir qorlaryna apta saıyn baqylaý júrgizilýde»,  - dedi E. Omarov.

«Álem Kómir» JShS qorynda kómir túsirý qyzý júrip jatyr. Seriktestik dırektory Natalıa Ivashına kómirmen qamtý týraly aıtyp berdi.

«Kómir únemi jetkizilip otyrady. Halyqtyń muqtajy árdaıym eskeriledi. «Qarajyra» kómir razrezimen tikeleı jumys isteýdemiz. Negizgi kómir resýrsy osy qordan alynady. Kómirdiń bir tonnasy - 14500 tg. Jylý maýsymy men suranystyń kóptigine qaramastan bul baǵa ózgermeıdi», - dedi Natalıa Ivanıshına.

Aıta ketý kerek, bıyl Almatyda kópqabatty turǵyn úılerge 15 qazannan bastap jylý beriledi.