Bıyl Kókshetaýda magıstraldyq jylý jelilerin jańartý jumystary júrgiziledi
KÓKShETAÝ. QazAqparat - Bıyl Kókshetaýda magıstraldyq jylý jelilerin jańartý jumystary júrgiziledi. Bul týraly «Kókshetaý jylý» kommýnaldyq kásiporynnyń bas dırektory Rýslan Maqyshev málim etti, dep habarlaıdy QazAqparat tilshisi oblystyq ishki saıasat basqarmasyna silteme jasap.
Kommýnaldyq kásiporynnyń bas dırektory Rýslan Maqyshevtiń aıtýynsha, «Kókshetaý jylý» oblys ortalyǵyn jylýmen qamtamasyz etýdiń negizgi kózi bolyp tabylady. Kásiporyn jylý qýatyn óndirý, taratýmen aınalysady.
«Kókshetaý jylý» kásiporyny 4 765 nysandy jylytady. Onyń 995-i kóp páterli turǵyn úı, 2530 jeke sektordaǵy úı, 117 bilim berý nysany, 47 densaýlyq saqtaý nysany, 158 mádenıet nysany men memlekettik mekemeler, 918 ónerkásip nysany men ózge de uıymdar», - dedi Rýslan Maqyshev.
Ol atap ótkendeı, jyl saıyn jylytý maýsymy aıaqtalǵannan keıin jazǵy ýaqytta negizgi jóndeý jumystary júrgiziledi. Ótken jyly 4 stantsııada qazandyq agregatyna aǵymdaǵy jóndeý júrgizildi, qubyr bloktary aýystyryldy, sondaı-aq 2 479 metr jylý magıstraldyq jáne oramishilik jeliler jańartyldy. Barlyq tutynýshylar úshin qajetti gıdravlıkalyq qysymdy qamtamasyz etetin ónimdiligi saǵatyna 1250 tekshe metr, qysymy 140 metr sý bolatyn «Grýndfos» fırmasynyń sorǵysy paıdalanýǵa berildi.
Kásiporyn bıyl magıstraldyq jylý jelilerin qaıta qurý jáne jańǵyrtý, qazandyq agregattaryn iske qosýdy josparlap otyr.
Sonymen birge, kásiporyn basshysy túıitkildi máselelerdiń de baryn atap ótti.
«Búgingi tańda oblys ortalyǵyndaǵy «Saryarqa» shaǵyn aýdanynda, sondaı-aq qalanyń ortalyǵynda jáne basqa da shaǵynaýdandarynda jańa turǵyn úıler men áleýmettik-mádenı maqsattaǵy nysandardyń qurylysy qarqyndy júrgizilýde. Bul kásiporynyń jumysyna keri áserin tıgizip otyr. Bir sózben aıtqanda bizge tehnıkalyq qyzmetkerler men quraldar qajet», - dep tolyqtyrdy kásiporyn dırektory.
Aıta keteıik, oblys ortalyǵynda Krasnoıar jáne Stantsıonnyı kentterindegi jylytý qazandyqtary bar. Búgingi tańda kásiporyn 4 myńnan astam nysandy ortalyq jylýmen qamtamasyz etedi.
