Bıyl Kókshetaýda 12-i turǵyn úı paıdalanýǵa beriledi
KÓKShETAÝ. QazAqparat - Bıyl Kókshetaý qalasynda salynyp jatqan 17 turǵyn úıdiń qalǵan 12-isi paıdalanýǵa beriledi. Bul týraly Kókshetaý qalasynyń ákimi Ermek Marjyqpaev «2017 jyldyń áleýmettik-ekonomıkalyq damýynyń qorytyndylary jáne 2018 jyldyń negizgi mindetteri týraly» halyq aldynda esep berý kezdesýinde aıtty, dep habarlaıdy QazAqparat tilshisi.
Kókshetaý qalasy sońǵy jyldary shyn mánindegi úlken qurylys alańyna aınalyp otyr. Qala ákimi mundaǵy isti 15,5 mıllıard teńgeniń qurylys jumystary atqarylyp, 158,8 myń sharshy metr páterdiń paıdalanýǵa berilýimen sıpattady.
«Bıýdjet qarajatymen salynyp jatqan 17 turǵyn úıdiń 5-ýi ótken jyly paıdalanýǵa berildi, 12-si bıyl salynyp bitedi. Sonymen qatar, bıylǵy jyly taǵy da 15 kópqabatty turǵyn úıdiń qurylysyn qolǵa alamyz. Bul qaladaǵy páter kezegi sanyn eleýli túrde qysqartatyny sózsiz», - dedi qala basshysy.
Qala ákiminiń aıtýynsha, shaharda keleshekte jańa sıpattaǵy mádenı-áleýmettik nysandar qatary óse túspek. Olardyń qatarynda qalanyń ońtústik-shyǵysyndaǵy mádenıet jáne demalys parki, jańa shirkeý jáne basqa nysandar bar. Áýezov kóshesiniń boıyndaǵy 108 páterlik jańa úıdiń ınjenerlik júıesi salynyp, abattandyrý jumystary atqaryldy. Vasılkovka shaǵynaýdanyndaǵy 94 jáne 28 gektarlyq, sondaı-aq Qylshaqty kóliniń mańyndaǵy 72 gektarlyq aýmaqtaǵy alańdarda qurylys júrgizýdiń túbegeıli jospar-jobasy jasalyndy. Eń mańyzdysy ol ótken jyly paıdalanýǵa berilgen «Neke saraıy» deýge bolady. Qalalyqtar kóp jyl kútken bul nysan otaý quryp jatqan jastardyń súıikti ornyna aınalyp otyr.
Eske sala keteıik, Kókshetaý qalasynyń ákimi Ermek Marjyqpaevtyń «2017 jyldyń áleýmettik-ekonomıkalyq damýynyń qorytyndylary jáne 2018 jyldyń negizgi mindetteri týraly» halyq aldynda esep berý kezdesýine aımaq basshysy Málik Myrzalın, oblystyq máslıhattyń hatshysy men depýtattary, oblys ákiminiń orynbasarlary, oblystyq departamentter men basqarmalar, kásiporyn, uıym basshylary men BAQ ókilderi qatysty.
