Bıyl kókpardan el birinshiligi «Uly doda» ataýymen jańa formatta ótedi
Mádenıet jáne sport mınıstrligi ulttyq sporttyń tanymaldylyǵyn arttyryp, ınfraqurylymyn damytý maqsatynda júıeli jarys uıymdastyrýdy kózdep otyr.
El chempıonaty aıasynda birneshe lıga jasaqtalady. «Alaman doda» nemese joǵary lıgada ótken jylǵy el chempıonatynyń qorytyndysy boıynsha 1-6 oryndardy ıelengen eń úzdik 6 komanda óner kórsetedi. Qatysýshy komandalar ár týrda óziniń nemese qarsylastyń alańynda oınaıtyn bolǵandyqtan kórermender joǵary lıgada 30 match tamashalaı alady.
«Mádenıet jáne sport mınıstrligi Qazaqstanda tolyqqandy kókpar ındýstrııasyn qalyptastyrý maqsatynda el chempıonatyn uıymdastyrýdy úlken jaýapkershilik sanaıdy. Ulttyq sport jankúıerleri jarty jyl boıy tartysqa toly kezdesýlerdi tamashalap, maýsym boıy óz komandasyna jankúıer bola alady. Kelesi jyldan bastap joǵary lıgada oınaıtyn komandalarǵa óz ıppodromy bolýy mindetteledi. Sondaı-aq, jastar men jasóspirimder komandalaryn qatar daıyndaý týraly shart qoıylady»,-dedi QR Mádenıet jáne sport vıtse-mınıstri Sársen Quranbek.
«Dúbirli doda» dep atalatyn Qazaqstan chempıonatynyń birinshi lıgasynda byltyrǵy el chempıonatynda 7-20 oryndardy ıelengen 14 komanda oınaıdy. Jarys 4 týrdan turady. Qatysýshy barlyq komandalar bir-birine qarsy kezdesý ótkizip, upaı jınaıdy. Joǵary jáne birinshi lıganyń jeńimpazdary Respýblıka kúni qarsańynda ótetin «Uly doda» jarysynda ózara myqtyny anyqtaıdy.
Budan bólek, el birinshiligi aıasynda «Kerme doda» ataýymen ekinshi lıga oıynǵa shyǵady. Bul jarysqa qujaty rastalǵan aýyldyq, aýdandyq nemese jekemenshik kez-kelgen komanda qatysa alady. Baıraqty báseke 2 týrdan turady jáne barlyq qatysýshy komandalar bir-birine qarsy kezdesý ótkizedi. «Kerme doda» jeńimpazy kelesi maýsymda birinshi lıgada oınaý múmkindigine ıe bolady. Al, birinshi lıganyń úzdik komandasy «Alaman dodaǵa» ıaǵnı, joǵary lıgaǵa ótedi.
