Bıyl qoǵamdyq oryndardy lastaǵan 22 myńnan astam adamǵa aıyppul salyndy - QR ІІM
ASTANA. QazAqparat - Bıyl qoǵamdyq oryndarda lastaǵan 22 myńnan astam adamǵa aıyppul salyndy. Bul jaıynda QazAqparattyń resmı saýalyna oraı QR Іshki ister mınıstrliginiń baspasóz qyzmetinen habarlady.
«Aǵymdaǵy jyldyń qańtarynda qoǵamdyq oryndardyń tazalyǵyn buzǵany úshin 22,7 myńnan astam adam ákimshilik jaýapkershilikke tartyldy. Onyń ishinde 10,2 myń adam abattandyrylǵan jerlerdi lastasa, 9,7 myń adam belgilenbegen jerlerde shylym shekken. Atalǵan quqyq buzýshylarǵa jalpy somasy 59 mln. teńgeden asatyn ákimshilik aıyppul salyndy», - delingen mınıstrlik aqparatynda.
Sondaı-aq QR Іshki ister mınıstrligi elimizdiń «Halyq densaýlyǵy jáne densaýlyq saqtaý júıesi týraly» kodeksiniń 159 babyna sáıkes temeki buıymdaryn myna oryndarda sheshýge tyıym salynatyndyǵyn eskertip ótken: bilim berý uıymdary, sondaı-aq kámeletke tolmaǵan adamdardyń demalýyna arnalǵan uıymdar, densaýlyq saqtaý uıymdary, qoǵamdyq tamaqtaný oryndary, kınoteatrlar, teatrlar, tsırkter, kontsert, kórý jáne kórme zaldary, sport arenalary jáne kópshiliktiń demalýyna arnalǵan basqa da jabyq ǵımarattar, sonyń ishinde túngi klýbtar, bı keshteri, murajaılar, kitaphanalar jáne lektorııler, poıyzdar men teńiz jáne ózen kóligi kemelerinde belgilenbegen jerler, áýe kemesiniń borty, jolaýshylardy tasymaldaýdy júzege asyrý kezinde avtobýstar, shaǵyn avtobýstar, trolleıbýstar, taksıler jáne qalalyq relstik kólik salondary, áýejaılardyń, temir jol, avtomobıl jáne sý vokzaldarynyń ǵımarattary, memlekettik organdar men uıymdar, jumys oryndary bolyp tabylatyn úı-jaılar, úılerdiń kireberisteri.
