Bıyl kitaphanashy mamandyǵyna grant sany 30 paıyzǵa artty

ASTANA. QazAqparat – Bıyl kitaphanashy mamandyǵyna memlekettik bilim grantynyń sany 30 paıyzǵa artty. Bul týraly Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan, dep habarlaıdy QazAqparat tilshisi.

«Ǵylym jáne joǵary bilim mınıstrligi 2023-2024 oqý jylyna «V043-Kitaphana isi, aqparattardy óńdeý jáne muraǵat isi» bilim berý baǵdarlamalarynyń toptaryna 100 bilim berý grantyn bólýdi josparlaýda. Atalǵan kórsetkish 2022-2023 oqý jylymen salystyrǵanda 75 paıyzǵa joǵary. Osy rette sizderdiń depýtattyq saýaldaryńyzdaǵy «Kitaphana isi» mamandyǵyna memlekettik grantty 30 paıyzǵa arttyrý týraly usynys eskerilgenin habarlaımyn.

Mádenıet jáne sport mınıstrligi jyl saıyn respýblıkalyq 007 «Mádenıet jáne óner salasyndaǵy qyzmetkerlerdiń biliktiligin arttyrý jáne qaıta daıarlaý» bıýdjettik baǵdarlamasy aıasynda elimizdiń memlekettik mádenıet uıymdarynyń qyzmetkerleri úshin alys jáne jaqyn shet elderde biliktiligin arttyrý sharalaryn uıymdastyrady. Osy rette 2023-2025 jyldary atalǵan bıýdjettik baǵdarlama aıasynda elimizdegi kópshilikke arnalǵan kitaphana qyzmetkerlerin oqytýdy josparlap otyr. Bıýdjettik josparǵa sáıkes 2023-2025 jyldary kópshilikke arnalǵan kitaphanalardyń 18 qyzmetkeri (2023 jyl – 6, 2024 jyl – 6, 2025 jyl – 6) biliktiligin arttyrady dep kútilýde», - dep atap ótedi Tamara Dúısenova óz jaýabynda.

Aıtýynsha, bul jumystardy júzege asyrýǵa Mádenıet jáne sport mınıstrligi 2023-2025 jyldary aralyǵynda mádenıet salasyndaǵy qyzmetkerlerdiń biliktiligin arttyrý jáne qaıta daıarlaý sharalaryn osy qyzmetti iske asyratyn ulttyq deńgeıdegi túrkitildes elderdiń bilim berý jáne mádenıet uıymdarynda uıymdastyrmaq. Onda elimizdiń kitaphanashylary túrki tildes memleketterdiń aldyńǵy qatarly kitaphanalarynda, bilim berý jáne mádenıet uıymdarynda kásibı biliktiligin shyńdaıtyn bolady. Búginde bul sharalardy júrgizý úshin memlekettik satyp alý konkýrstary júrgizilýde.

«Jalpy, kitaphanany damytý, balalar men jasóspirimderdiń oqýy, sondaı-aq olardyń qyzmetkerlerine jaǵdaı jasaý máseleleri Úkimettiń turaqty baqylaýynda. Sonymen birge, Úkimet Parlament Májilisiniń depýtattarymen birge balalardyń kitap oqýǵa qushtarlyǵyn oıatý jáne «Balalar kitaphanasy» jańa baǵdarlamasyn júzege asyrý boıynsha jetildirý jáne retteý jóninde syndarly usynystar ázirleýge daıyn ekendigin bildiredi», - dedi mınıstr.