Bıyl QHA qaıyrymdylyq sharalaryna 1,8 mlrd. teńgege jýyq qarjy jumsady

ASTANA. QazAqparat - Bıyl QHA qaıyrymdylyq sharalaryna 1,8 mlrd. teńgege jýyq qarjy jumsady. Bul týraly búgin QR Memlekettik hatshysy Gúlshara Ábdiqalyqovanyń tóraǵalyǵymen ótken Qazaqstan halqy Assambleıasy jylyn uıymdastyrý men ótkizý jónindegi memlekettik komıssııanyń qorytyndy otyrysynda QHA Tóraǵasynyń orynbasary - Assambleıa hatshylyǵynyń meńgerýshisi Eraly Toǵjanov málim etti.

«2015 jyl QHA jyly ǵana emes, ol eń aldymen birliktiń, eldiktiń jyly, Táýelsizdigimizdi nyǵaıtatyn erekshe jyl boldy. QHA jylynyń sharalaryn ótkizýdi uıymdastyrýǵa barsha el azamattaryn, azamattyq qoǵam ınstıtýttaryn, barlyq mekemelerdi, memlekettik organdardy jumyldyrý qamtamasyz etildi. 5426 eldi mekende ótkizilgen 30 myńnan astam sharalarǵa 9 mıllıonǵa jýyq adam qatysyp, bul sharalarda aýyldyq jerler de qamtyldy»,-dedi E. Toǵjanov.

Sonymen qatar ol bıyl Qazaqstandaǵy etnostar úshin memlekettik tildi meńgerý jyly bolǵanyn atap ótti. Jalpyulttyq «Myń bala» mádenı-aǵartýshylyq jobasy aıasynda 235 myń balanyń qatysýymen 7 863 shara ótkizildi. 43 myńnan astam bala memlekettik tildi tolyq meńgerip shyqty.

Onyń sózine qaraǵanda, QHA jyly maqsattaryna qol jetkizý úshin 16 jalpyulttyq jobalar júzege asyrylyp, olardyń barlyǵy naqty nátıjelerge baǵyttaldy.

Assambleıa jylynda qaıyrymdylyq aktsııalaryna erekshe mán berildi. «Taıqazan. QHA -20 izgi is» basty jobasy aıasynda 6 953 shara ótkizilip, el halqyna 1 mlrd. 790 mln. teńge somasynda kómek kórsetildi.

Sonymen qatar «Qamqor» aktsııasy barysynda az qamtylǵan otbasylar 413 mln. teńge kóleminde kómek aldy. «Meniń Qazaqstanym» aktsııasyna 920 myńnan astam adam qatysyp, 50 myńnan astamy medıtsınalyq kómek aldy.