Bıyl kezekte turǵan qansha elordalyq baspanaly bolady

Bıyl elordada baspana kezeginde turǵan 5 993 otbasy qonys toıyn toılaıdy. Bul týraly Astana qalalyq turǵyn úı jáne turǵyn úı ınspektsııasy basqarmasynyń basshysy Ánýar Saıpov aıtty, dep habarlaıdy QazAqparat tilshisi.

«Jalpy, búginde 46 267 azamat baspana kezeginde tur. Olar: kópbalaly otbasylar, jetim balalar, memlekettik qyzmetshiler, halyqtyń áleýmettik osal toptary, jalǵyz baspanasy apatty dep tanylǵan adamdar. Jyl basynan 1 942 azamat kezekke qoıylyp, kezekten 2 975 adam alyndy. Áleýmettik kómek kórsetý aıasynda 277 turǵyn úı sertıfıkaty berildi. Baspanany nesıege alý úshin bastapqy jarnaǵa tóleýge arnalǵan onyń mólsheri 1,5 mln teńgeni quraıdy. Bıyl 5 993 páter berý josparymyzda bar. Onyń ishinde 1 710 páter nesıege beriledi. Qarjylandyrýdyń bolmaýyna baılanysty 2 nysan kelesi jylǵa aýystyrylýy múmkin. Páterlerdiń bir bóligin Otbasy banki arqyly satpaqpyz. Baǵystan turǵyn úı kesheninen 400-den astam páterdi jyl sońyna deıin beremiz», - dedi ol Astana qalalyq máslıhatynda.

Onyń atap ótýinshe, bıyl jumys isteıtin jastarǵa 2 194 páter berý kózdelgen. Munan bólek, halyqtyń áleýmettik osal toptaryna 1 889 páter beriledi. Onyń ishinde 320 kópbalaly otbasy, 320 jetim bala baspanaly bolady.

«2 jyl qatarynan Otbasy bankimen birge «Elorda jastary» baǵdarlamasy júzege asyrylyp kele jatyr. Bıyl 200 ótinimdi iriktep aldyq. Qazir qujattardy rásimdeý protsesi júrip jatyr», - dedi Ánýar Saıpov.