Bıyl Kentaýda ken óndirý kásiporny iske qosylady

Bul baǵyttaǵy jumystarǵa búgingi kúnge ınvestorlar 120 mln teńgeniń qarjysyn jumsaǵan. Ol qarjy kepilde turǵan ǵımaratty satyp alýǵa, qujattamalardy retteýge jumsalǵan. Endigi kezekte quny 3 mln AQSh dollary bolatyn qural-jabdyqtar satyp alynyp, ken óndirý kásiporny óz jumysyn bastamaq. Atalǵan kásiporyn iske qosylǵan ýaqytta 200-ge jýyq adam jumyspen qamtylady dep josparlanýda. Bul týraly Kentaý qalasynyń ákimi Ábdibaqyt Maqulbaev aýyl turǵyndary aldyndaǵy eseptik kezdesýinde málim etti,  dep habarlaıdy qala ákiminiń baspasóz qyzmeti.

  Búginde jobalaý smetalyq qujattamalary ázirlenip jatqanyn aıtqan «Aşysaı taý-ken kombınaty» JShS dırektory Nysanbaı Kenjebaev aqpan, naýryzda zaýytty qaıta tirkeý jáne zańdastyrý jumystary júrgiziletinin jetkizdi.

   «Tabıǵatty qorǵaý jaıyn standarttarǵa sáıkestendiremiz. Bul jumystardyń barlyǵyn atqarý úshin ýaqyt kerek. 25 jylǵa qabyldanyp otyrǵan baǵdarlama boıynsha joba jer qoınaýyndaǵy qazba baılyqtardy ıgerý maqsatynda júzege asady. Joba boıynsha 200-ge jýyq adam jumyspen qamtylady. Jyl sońynda kásiporyn óz jumysyn bastaıdy dep kútilýde», - dedi Nysanbaı Kenjebaev.

  Osy rette qala basshysy jyl aıaǵyna deıin jergilikti turǵyndardy arnaıy baǵdarlamalar boıynsha oqytyp, mamandyqtaryn sáıkestendirý jumystaryn júzege asyrý qajettigin atap ótti.

   Eseptik kezdesýde turǵyndardyń suraqtaryna jan-jaqty jaýap bergen Á.Maqulbaev sala mamandaryna atqarylýy tıis naqty tapsyrmalardy júktep, aldaǵy mindetterdi naqtylady.