Bıyl «Qazaqtelekom» 400-den astam aýylǵa ınternet tartady

NUR-SULTAN. QazAqparat – Aldaǵy eki jylda 2,5 mln aýyl turǵyny ınternet ıgiligine qol jetkizedi. Bul týraly «Qazaqtelekom» aktsıonerlik qoǵamynyń bas qarjy dırektory Ashat Ózbekov BAQ ókilderimen ótken brıfıngte aıtty.

Ashat Ózbekov «Qazaqtelekom» tarapynan «Aýyldyq jerlerde talshyqty-optıkalyq baılanys jelilerin salý» atty joba daıyndalyp jatqanyn aıtady. Osy jobanyń arqasynda kelesi jyldyń aıaǵyna deıin 800-den astam aýyl ınternetke qosylýy tıis.

«Tsıfrlyq Qazaqstan» baǵdarlamasy aıasynda aýyldyq eldi mekenderde optıkalyq-talshyqty baılanys jelisin salý jobasy bizdiń kompanııa úshin strategııalyq maqsattyń biri sanalady. Ótken jyly QR Aqparat jáne kommýnıkatsııalar mınıstrligimen osy maqsatta memlekettik-jekeshelik áriptestik sharty jasalǵan bolatyn», - degen Ashat Ózbekov osy joba aıasynda 15 myń shaqyrymnan astam optıkalyq-talshyqty magıstral salynatynyn aıtty.

«Kelesi jyldyń sońyna deıin 800-den astam shalǵaı aýyldy ınternetke qosý josparlanǵan. Al bıyl 400-den astam aýyldyq eldi mekende ınternet jelisin qosý josparlanyp otyr», - dedi Ashat Ózbekov.