Bıyl Qazaqstannyń keıbir elektr stansalarynda kómir men mazýt qory byltyrǵydan az - Úkimet
ASTANA. 9 qazan. QazAqparat - Qazaqstannyń keıbir elektr stansalarynda kómirdiń qory ótken jylǵy deńgeıge qaraǵanda tómen.
Bul týraly selektorlyq rejımdegi Úkimet otyrysynda Indýstrııa jáne jańa tehnologııalar vıtse-mınıstri Baqytjan Jaqsalıev málim etti.
Onyń sózinshe, jalpy jylý berý maýsymyn bastaýǵa qajetti energııa kásiporyndarynyń jabdyqtaryn daıyndaý sharalary aıaqtalǵan. Atap aıtqanda, qazan aınnyń basynda 8 energııa blogynda, 41 qazandyqta, sondaı-aq 18 týrbınada tıisti jumystar aıaqtalǵan eken. Al 1 blokta, 7 qazandyq pen 19 týrbınada túrli deńgeıdegi jumystar kestege sáıkes atqarylýda.
Belgili bolǵandaı, aǵymdaǵy aıdyń basynda qoımalarda 5 mln. tonna kómir jınaqtalǵan. Bul kórsetkish ótken jylǵa qaraǵanda 37 paıyzǵa artyq. Alaıda, jınaqtalǵan mazýt kólemi byltyrmen salystyrǵanda 10 paıyzǵa tómen bolyp shyqty. Onyń bıylǵy qory 95,6 myń tonna deńgeıinde eken.
Sóz sońynda vıtse-mınıstr sonymen qatar keıbir elektr stansalarynda kómir qory ótken jylǵa qaraǵanda tómen ekenin jetkizdi.
