Bıyl Qazaqstannyń keden organdary esirtki zattary aınalymynyń 21 faktisin anyqtady

ASTANA. QazAqparat - Aǵymdaǵy jyl basynan beri Qazaqstan Respýblıkasynyń keden organdary esirtki zattary men psıhotroptyq zattardyń zańsyz aınalymynyń 21 faktisiniń jolyn kesti, olar boıynsha 32 qylmystyq is qozǵaldy.

«Bul rette, 5 keli 197 gramnan asa esirtki zattary anyqtalyp, olardyń ishinde 3,27 kelisi «geroın», 1,3 kelisi «gashısh», 117,69 gramy «marıhýana» jáne 446,68 gramy esirtkiniń ózge túrleri», - delingen QR QM KBK baspasóz qyzmetiniń málimetinde.

2013 jyly keden qyzmeti esirtki quraldary men psıhotroptyq zattardyń zańsyz aınalymynyń 50 faktisiniń jolyn kesip, osy boıynsha 70 qylmystyq is qozǵaldy.

Bul turǵyda 244 keli 880 gramnan asa esirtki zattary anyqtalyp, onyń 38,3 kelisi «geroın», 1,7 kelisi «gashısh» boldy.