Bıyl Qazaqstannyń qaı óńirlerine aýyz sý qubyry júrgiziledi

NUR-SULTAN. QazAqparat – Bıyl Qazaqstannyń biraqatar eldi mekenderine aýyz sý júrgiziledi. Bul týraly QR Ekologııa geologııa jáne tabıǵı resýrstar mınıstrliginiń resmı saıtynan málim boldy.

Mınıstrlik taratqan málimetterge qaraǵanda, 2021 jyly Qyzylorda oblysynyń Jańaqorǵan aýdanyndaǵy Talap sý qubyrynyń qurylysy aıaqtalmaq. Onyń jalpy quny - 5 932,3 mln.tenge. Atalmysh qurylys aıaqtalǵan soń óńirdegi 9 aýylǵa sý jetkizý jumystary jaqsarady, al 19,7 myń adam turatyn 3 aýyl aýyzsýmen qamtylady.

Sondaı-aq bıyl Soltústik Qazaqstan oblysynda Presnov toptyq sý qubyry (ІІ kezeń) qaıta jańartylyp jatyr. Jobanyń jalpy quny - 4 699,6 mln.teńge. 2021 jyly ol paıdalanýǵa berilse, óńirdiń 16 myń adam turatyn 17 aýylyna sý berý jaqsarady.

Mınıstrlik 2022 jyldyń sońyna deıin qurylysy uzaqqa sozylǵan úsh jobany aıaqtaýdy josparlap otyr.

«Úkimettiń tapsyrmasymen mınıstrlik buryn bastalyp, aıaqtalmaǵan jobalardy qolǵa aldy. Biz 2019 jyly 3 magıstraldi sý qubyryn qoldanysqa berdik, bıyl – 1 sý qubyryn, al 2022 jylǵa deıin taǵy 3-eýi paıdalanýǵa beriledi. Bul 210,6 myń adam turatyn 39 aýyldy sýmen qamtıdy», - dedi Sý resýrstary komıteti tóraǵasynyń orynbasary Maqsat Aıashev.

Aıta keteıik, búginde qalalardyń 97,2%-y, al aýyldardyń 86,4%-yna ortalyqtandyrylǵan sý tutynady. 5 jyl ishinde elde 3 myń shaqyrym toptyq sý qubyrlary salynady. Osylaısha, aýyz sýmen qamtý 100%-ǵa jetedi.