Bıyl Qazaqstannyń energetıka salasyna 178 mlrd teńge ınvestıtsııa josparlanady
ASTANA. QazAqparat - Alty jyl ishinde Qazaqstannyń elektr energetıkasyna 700 mlrd teńge ınvestıtsııa salyndy. Bul týraly búgin Májiliste ótip jatqan Úkimet saǵatynda málim boldy.
Úkimet saǵaty barysynda baıandama jasaǵan Energetıka mınıstri Vladımır Shkolnıktiń aıtýynsha, sońǵy alty jylda shekti tarıf baǵdarlamasyn júzege asyrý barysynda elektr energetıkasy salasyna jyl saıynǵy ınvestıtsııa aýqymy 5 esege artqan.
«Búgingi kúni bul kórsetkish alty jyl boıynsha 700 mlrd teńgeniń ınvestıtsııalanǵanyn kórsetip otyr jáne osynyń arqasynda 5 myń mVt quraıtyn qoldanystaǵy qýat nysandary jańǵyrtylsa, 1700 mVt quraıtyn elektr jelileriniń nysandary jańartyldy. Osynyń ózi ekonomıkanyń elektr qýatyn tutynýyn tutastaı jaýyp otyr. Jalpy, 2009-2015 jyldar aralyǵynda qosymsha engiziletin qýat shamamen 3 300 mVt quraıtyn bolady», - dedi vedomstvo basshysy.
Onyń aıtýynsha, 2015 jyly energetıka salasyna josparlanyp otyrǵan ınvestıtsııa kólemi 178 mlrd teńgeni quramaq.
