Bıyl Qazaqstannyń bıdaı eksporty 7 mln. tonnadan kem boljanbaıdy - A. Mamytbekov
«Jazǵy ýaqyttary óńirlerde jaýyn-shashyn normadan áldeqaıda kóp túsip, kún salqyndaý boldy. Árıne, jazda jaýyn-shashyn kerek, alaıda tómengi temperatýra men kún qyzýynyń jetispeýshiligi astyq daqyldarynyń tolyq pisip jetilýine múmkindik bermedi. Sosyn bıylǵy jyldyń kúzgi ýaqytynda da jaýyn kóp boldy, jıyn-terimdi qıyndatyp tastady. Nátıjesinde Soltústik Qazaqstan jáne Qostanaı oblystarynyń jekelegen aýdandarynda jıyn naýqany áli kúnge jalǵasýda, Aqmola oblysyndaǵy eki aýdandaǵy kúzgi jumys aıaqtalýǵa jaqyn», - dedi Asyljan Mamytbekov.
Onyń aıtýynsha, ákimdikterdiń aldyn ala málimetterine sáıkes, búgingi kúni elimiz boıynsha 14,5 mln. gektarda alańda nemese egin alqabynyń 96,5 paıyzynda astyq daqyldary jınaldy.
«Bastyrylǵan bıdaı shamamen býnkerlik salmaqta 18,3 mln. tonnany qurady, ár gektardan egin túsimi 12,6 tsentnerdi qurap otyr. Al maıly daqyldar egistik alqabynyń 64 paıyzynan jınaldy, jınalǵan baqsha ónimderi men kartop 99,6 paıyzdy qurady. Bul rette kókónis daqyldary byltyrǵy deńgeıden gektaryna 12 tsentnerge artyq, al kartop gektaryna 15,9 tsentnerge artyq», - dedi A. Mamytbekov.
Sonymen qatar, mınıstr aýyl sharýashylyǵy taýarlaryn óndirýshiler aýa raıynyń qolaısyzdyǵyna qaramastan, jıyn terim barysynda meılinshe jaqsy kórsetkishke qol jetkizgenin atap ótti. Onyń aıtýynsha, shyǵyn búgingiden áldeqaıda kóp bolýy yqtımal edi.
«Salystyrý retinde aıtsaq, byltyrǵy jyly bıylǵydan jaǵymdy aýa raıyna qaramastan egin alqabynyń 99,6 paıyzy jınalǵan edi. Endeshe aıyrma sonshalyqty úlken emes, bul egistik basynda júrgen sharýalardyń eren eńbegi. Aǵymdaǵy jyly jalpy bıdaı kólemi tazartylǵannan keıin shamamen 17,6 mln tonnaǵa boljanady. Bul bıdaıǵa eksporttyq áleýetti jeti mıllıon tonnaǵa jetkizýge múmkindik beredi», - dedi A. Mamytbekov.