Bıyl Qazaqstannyń batys aımaǵynda 1200 shaqyrymnan astam jol jóndeýden ótedi
Vedomstvo dırektorynyń málimetinshe, Aqtóbe óńirindegi respýblıkalyq mańyzy bar joldardyń jalpy uzyndyǵy - 1 869 shaqyrym. Onyń 67 % jaqsy jáne qanaǵattanarlyq deńgeıde bolsa, 16 % syn kótermeıdi.
Aǵymdaǵy jyly qaıta jańǵyrtý jumystarymen 311 shaqyrym jol qamtylady. Bul 17 % quraıdy. Oǵan «Aqtóbe – Qandyaǵash», «Qandyaǵash – Maqat» ýchaskeleri jatady. Sonymen qatar jobalyq-smetalyq qujattama eki ýchaske boıynsha júrgizilýde. Olar – «Aqtóbe – Qarabutaq – Ulǵaısyn» jáne «Qandyaǵash – Shalqar – Yrǵyz – Qostanaı oblysy shekarasy».
Osy jyly ortasha jóndeý jumystarymen «RF shekarasy (Samara baǵyty) – Shymkent» jáne «Aqtóbe – Mártúk – RF shekarasy (Orynborǵa)» joldary qamtylady.
«Atyraý oblysyndaǵy respýblıkalyq mańyzy bar joldardyń jalpy uzyndyǵy - 1 126 shaqyrym. Onyń 50 % jaqsy jáne qanaǵattanarlyq deńgeıde bolsa, 16 % kúrdeli jóndeý jumystaryn qajet etedi. Qazir oblys joldarynyń 34 % nemese 385 shaqyrymy qaıta jańǵyrtylady. Olardyń qatarynda «Qandyaǵash-Maqat», «Atyraý-Astrahan» bar. «Aqtóbe-Atyraý» joly boıynsha jobalyq-smetalyq qujattama ázirlenýde. 70 shaqyrymdy quraıtyn 2 joba ýchaskeleri ortasha jóndeýden ótedi», - dep atap ótti jaýapty maman.
Batys Qazaqstan oblysyndaǵy respýblıkalyq mańyzy bar joldardyń jalpy uzyndyǵy - 1 414 shaqyrym. Onyń 69 % jaqsy jáne qanaǵattanarlyq deńgeıde bolsa, 14 % kúrdeli jóndeýdi qajet etedi. A-30 «Podstepnoe – Fedorovka – RF shekarasy» qaıta jańǵyrtý jumystarynan ótip, «Atyraý-Oral» tas joly boıynsha jobalyq-smetalyq qujattama ázirlenýde.
Óńirdegi 248 shaqyrym jol kúrdeli jóndeý jumystarynan ótedi. Ol 17 % quraıdy. Olarǵa 2 telim tıesili - «Qaztalovka - Jánibek – RF shekarasy» men «Ónege-Bısen-Saıhın».
5 joba ortasha jóndeý jumystarymen qamtylady. Olar «Han Orda aýylyna kireberis jol», «Oral-RF shekarasy (Buzylyq baǵyty)» jáne «RF shekarasy (Samaraǵa) - Shymkent» (3 ýchaske).
«Batys óńirlerinde turatyn turǵyndarymyzdyń shaǵymdary óte oryndy ári obektıvti. Eskere ketý kerek, óńirde jol qurylysyna qajet ınertti materıaldar tapshy. Bul másele quzyrly organdarmen birlese sheshilýde. Bıyl 1200 shaqyrymnan astam joldy jóndeýden ótkizýdi josparlaýdamyz. Merdiger uıymdardyń qyzmetin baqylaý jumystary kúsheıtildi. Sonymen birge «Kazahavtodor» JShS-ne joldy kútip ustaý jumystarynyń sapasyn arttyrý tapsyryldy. Joldy júıeli túrde kútip ustaý mańyzdy, - dedi QazAvtoJol basshysy Meıirhat Qasymbaev.
Eske sala keteıik, el turǵyndarynyń respýblıkalyq mańyzy bar joldarǵa qatysty barlyq suraqtary úshin 1403 qysqa nómiri jumys isteıdi.