Bıyl Qazaqstannyń barlyq óńirinde «qoǵamdyq baqylaý kartasy» engiziledi
«Qoǵamdyq baqylaý kartasy» azamattardyń belsendiligin arttyrýdyń jańa quralyna aınalyp, jemqorlyq táýekelderdi tómendetýge jáne jergilikti jerlerde memlekettik organdar jumysynyń sapasyn arttyrýǵa septigin tıgizip otyr. Azamattardyń ótinimimen 2 myńnan astam másele sheshilip, memlekettik satyp alýlardy júrgizý, jer ýchaskelerin bólý barysyndaǵy asyra paıdalý múmkinshiligin aldyn aldy», - dedi agenttik basshysy Kásipkerlerdiń sybaılas jemqorlyqqa qarsy is-qımyly jónindegi ІІІ respýblıkalyq forýmda.
Osy rette, ol tsıfrlyq jemqorlyqqa qarsy quraldardyń basymdyǵy eskerilip, Nıderlandy elshiligi men Qazaqstandaǵy Parlamentarızmdi damytý qorynyń qoldaýymen «Astana qalalyq qoǵamdyq baqylaýdyń ınteraktıvti kartasy» iske qosylǵanyn aıtty. Karta shynaıy ýaqyt rejıminde Astana qalasynyń qurylys, jóndeý jáne áleýmettik nysandardy kútip ustaýǵa bólgen jalpy somasy 150 mlrd teńgeden asatyn bıýdjet qarajaty týraly aqparatty erkin alýǵa múmkindik beredi.
«Kez kelgen adam táýligine 24 saǵat boıy atalǵan protsesti baqylap, olardy qujattamalarmen salystyra alady. Bul memlekettik organdar qyzmetin tekserý ǵana emes, sonymen birge memlekettik satyp alýlarǵa qatysatyn bıznestiń bıýdjet qarajatyn tıimdi ıgerýine monıtorıng jasaý múmkinshiligi de. 2019 jyly ol Qazaqstannyń barlyq óńirinde iske qosylatyn bolady», - dedi Alıek Shpekbaev.
