Bıyl Qazaqstannyń áýe keńistiginde qansha ushaqqa qyzmet kórsetildi
ASTANA. QazAqparat - Bıyl Qazaqstannyń áýe keńistiginde qyzmet kórsetilgen ushaq saparlarynyń sany 6 paıyzǵa artty, dep habarlaıdy QazAqparat.
«2018 jyldyń 8 aıynda Qazaqstan Respýblıkasynyń áýe keńistigi arqyly ushqan ári qyzmet kórsetilgen ushaqtardyń sany 171 845-ke jetti. Bul 2017 jyldyń sáıkes kezeńimen salystyrǵanda 9 522-ge artyq, ıaǵnı áýe saparlarynyń kólemi 5,87 paıyzǵa artty. Qazaqstandyq áýe kompanııalary 66 489 ret, al sheteldik áýe kompanııalary 105 356 ret ushqan», - dep atap ótilgen QR IDM baspasóz qyzmetiniń málimetinde.
Belgili bolǵandaı, elimizdiń áýe keńistigi arqyly 2018 jyldyń qańtar-tamyz aılarynda turaqty tranzıttik saparlar sany 76 431-ge jetken. Bul ótken jyldyń sáıkes kezeńimen salystyrǵanda 5 328-ge (+ 7.49%) artyq.
«Sheteldik áýe kompanııalarynyń charterlik saparlarynyń ósimi +18,89 paıyzdy qurady (2017 jyly 6 621 reısten 2018 jyly 7 872-ge deıin). Tranzıttik qozǵalystyń artýy sheteldik áýe kompanııalarynyń turaqty reısteriniń jıiliginiń kóbeıýimen baılanysty. Qazaqstannyń áýejaılaryna qonǵan sheteldik áýe kompanııalarynyń turaqty reısteriniń oryndalý sany 2018 jyldyń qańtar-tamyz aılarynda 15 221-ge jetti. Osy kórsetkish ótken jyldyń sáıkes kezeńine qaraǵanda 354-ke (+ 2.38%) artyq», - delingen habarlamada.
