Bıyl Qazaqstannyń 8 myńnan astam er azamaty áskerı daıarlyqtan ótedi
Áskerı mindettilerdi daıarlaý Qazaqstannyń túrli óńirlerinde ornalasqan bes oqý-jattyǵý ortalyǵynda júzege asyrylýda. 2013 jyly barlyǵy segiz myńnan astam azamat «Áskerı mindettilerdi áskerı oqý-jattyǵý jıyndaryna shaqyrý týraly» Úkimettiń qaýlysyna sáıkes daıarlyqtan ótedi.
QR Qorǵanys mınıstrliginiń málimetinshe, búgingi tańda 800-den astam áskerı mindetti áskerı jıynnan ótti. Onyń ishindegi úsh júz jas jigit buryn Qarýly Kúshter qatarynda qyzmet ótkermegen. Áskerı qyzmet tájirıbesi joq azamattardy daıarlaý Qaraǵandy oblysyndaǵy Spassk oqý-jattyǵý ortalyǵynda uıymdastyrylǵan. Bir aı boıy jıynǵa shaqyrylǵan azamattar áskerı pánderdi zerdelep, saptyq jáne atys daıarlyǵynyń negizderimen tanysady. Bir aı boıy ótetin daıarlyq áskerı ant qabyldaýmen aıaqtalady.
Óz ýaqytynda ant qabyldap, belgili bir áskerı mamandyqtyń ıesi bolǵandar daıarlaý jáne qaıta daıarlaý baǵdarlamasy boıynsha oqyp úıretiletin bolady. Azamattardyń bul sanaty Taraz, Aqtaý, Semeı qalalaryndaǵy, Almaty oblysynyń Qaraoı kentindegi oqý-jattyǵý ortalyqtarynda áskerı jıynnan ótedi.
2013 jyldyń sońyna deıin jeti myńnan astam adam jıyndarǵa qatysady. Daıyndalyp, oqytylǵan osy azamattar áskerı oqytylǵan rezerv quramyna enetin bolady.
Oqý-jattyǵý jıyndaryna eki aıǵa deıingi merzimge áskerı mindettiler bes jylda bir ret shaqyrylady. Oqý-jattyǵý jıyndarynyń arasyndaǵy kezeńderde on bes kún merzimge deıingi tekserý jıyndaryna shaqyrylýy múmkin.
Zapasta bolý ýaqytyndaǵy jıyndardyń jalpy merzimi on segiz aıdan aspaýy tıis. Bul rette oqý-jattyǵý jıyndarynda bolýdyń jalpy merzimine tekserý jıyndarynda bolǵan ýaqyt ta qosa esepteledi. Soldattar (matrostar) men serjanttar (starshınalar) úshin áskerı qyzmetshiler zapasta bolýynyń shekti jasy elý jasqa deıin, al ofıtserlik quram úshin - alpys jasqa deıin.
Áskerı oqý-jattyǵý jıyndary kezeńinde áskerı mindettilerdiń jumys orny men laýazymy saqtalady, olarǵa memleket esebinen ortasha aılyq jalaqysy, al jumys istemeıtinderge eń az jalaqy mólsheri tólenedi.