Bıyl Qazaqstannan qajylyqqa 5 myń adam barady
ALMATY. 16 shilde. QazAqparat - Bıyl Saýd Arabııasy Qazaqstanǵa qajylyqqa 5 myń kvota bóldi. Bul jaıly Qazaqstan musylmandary dinı basqarmasy jáne Ortalyq Azııa múftıler keńesiniń tóraǵasy, Bas múftı, sheıh Ábsattar qajy Derbisáli búgin Almatyda qasıetti Ramazan aıyna arnalǵan baspasóz máslıhatynda aıtty.
«Biz jylda qajylyq maýsymy bitkennen keıin búkil týrıstik fırmalardy shaqyryp, nátıjesin shyǵaramyz. Sondaı-aq qajylyq aıaqtalǵan soń Saýd Arabııasynyń Qajylyq mınıstri meni shaqyryp, Qazaqstandaǵy aldaǵy kezeńdegi qajylyqty uıymdastyrý máselesin talqylaıdy. Qajylyqqa qansha kvota suraısyzdar degendeı. 25 sáýir men 1 mamyr aralyǵynda Mekkede boldym», - dedi Ábsattar Derbisáli.
Bas múftıdiń aıtýynsha, bıyl Qazaqstan 5 myń kvota suraǵan. Osy arada keıbir jamaǵan kvotalar tegin taratylady dep oılaıdy, ol qate túsinik. 5 myń kvota, ıaǵnı Saýd Arabııasy qajylyqqa Qazaqstannan 5 myń adamdy qabyldaıdy degen sóz. Jalpy Qazaqstannan 1994 jyly qajylyqqa 170 adam barsa, byltyr bul san 4097 adamdy qurady. Al jatyn oryn, as-sý, kólik máselesimen álemdik tájirıbe boıynsha týrıstik fırmalar aınalysady. Saýd Arabııasynda qajylyq kezinde bir qaladan ekinshi qalaǵa barý úshin qajylar jergilikti týrıstik fırmalarǵa tirkeledi.
