Bıyl Qazaqstanǵa qansha eńbek mıgranty keletindigi anyqtaldy
NUR-SULTAN. QazAqparat - Aǵymdaǵy jyly elimizge shamamen 600 myń eńbek mıgranty kelmek. Bul týraly búgin QR ІІM Kóshi-qon qyzmeti komıtetiniń tóraǵasy Murat Qabdenov aıtty, dep habarlaıdy QazAqparat tilshisi.
«Eńbek mıgranttaryn zańdastyrý protsesin 2014 jyly bastaǵan edik. Sodan beri eńbek mıgranttarynyńsany jyl saıyn artyp keledi. Ótken jyly Qazaqstanǵa 551 myń eńbek mıgranty kelgen bolatyn. Memlekettik bıýdjetke 6 mlrd teńgeden astam salyq tústi. Al bıyl elimizge nápaqy tabý úshin shamamen 600 myń eńbek mıgrant keledi dep kútip otyrmyz», - dedi ol BAQ ókilderine elordadaǵy Kóshi-qon qyzmetterin kórsetý ortalyǵynyń jumysyn tanystyrý barysynda.
Onyń dereginshe, eńbek mıgranttary negizinen Ózbekstan, Tájikstan, Ázerbaıjan elderinen keledi. Al EAEO-ǵa múshe elderdiń ókilderi eńbek patentinen bosatylǵan. Olar jumys berýshilermen eńbek kelisimsharty boıynsha tikeleı jumys jasaı beredi jáne barlyq memlekettik salyqtardan bosatylǵan.
«Qysqy ýaqytta Kóshi-qon qyzmetteri ortalyǵy kúnine 30-50, kóktem-jaz aılarynda 100-200 ımmıgrantqa qyzmet kórsetedi. Bul rette eńbek ımmıgranttary jaýapkershilikke tartylmaıdy. Eńbek ımmıgranttary jeke tulǵalarda jumys isteıdi. Olardyń zańdy tulǵada jumys isteýge quqy joq. Zańdy tulǵalarda, ıaǵnı kásiporyndarda jumys isteıtin eńbek mıgranttary ákimdikterde rásimdeledi. Mınıstrlik (QR Іshki ister mınıstrligi - avt.) Eńbek jáne halyqty áleýmettik qorǵaý mınıstrligi ázirleıtin zań jobasy aıasynda alys shetelderden keletin mıgranttardy zańdastyrý jumysyn aıaqtaýdy josparlap otyr», - dedi Murat Qabdenov.
