Bıyl qazaqstandyqtardyń shetelderdegi qarjylyq shottary boıynsha aqparat almasý bastalady
NUR-SULTAN. QazAqparat – Bıyl qazaqstandyqtardyń 100-den astam ıýrısdıktsııadaǵy qarjylyq shottary boıynsha aqparat almasý bastalady. Bul týraly búgin Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.
«Biz elektrondy shot-faktýralardy paıdalaný mindetti bolatyn sýbektilerdiń tizbesin keńeıtýge nıettimiz. Qazirgi kezde elektrondyq shot-faktýralardy tek qosylǵan qun salyǵyn tóleýshiler, sondaı-aq, pılottyq rejımde dárilik zattar men altyn kenin ótkizýshiler ǵana qoldanady», - dedi ol.
Mınıstr kapıtaldy shetelge shyǵarýǵa jáne ekonomıkany deofshorızatsııalaýǵa qarsy is-qımyl boıynsha keshendi jumystar júrgizilip jatqanyn aıtty.
«Ekonomıkalyq yntymaqtastyq jáne damý uıymy jáne Halyqaralyq qarjy uıymdarymen málimetterdi elektrondyq almasý aıasynda kópjaqty konventsııaǵa qol qoıyldy. Osy jyldan bastap bizdiń azamattarymyzdyń 100-den astam ıýrısdıktsııada qarjylyq shottary boıynsha aqparat almasý bastalady», - dedi Erulan Jamaýbaev.
