Bıyl qazaqstandyq kremnııden jasalǵan kún energetıkasy ónimderi shetelge shyǵatyn bolady
ASTANA. 21 aqpan. QazAqparat - Bıylǵy jyldyń ekinshi jartysynda qazaqstandyq kremnııden jasalǵan kún energetıkasy ónimderi shetelge shyǵarylatyn bolady.
Bul týraly Parlament Cenatynyń jalpy otyrysynda QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev osylaı málim etti.
Toqtala ketetin jaıt, «Jańartylatyn energııa jónindegi halyqaralyq agenttiktiń Jarǵysyn ratıfıkatsııalaý týraly» qujatty talqylaý barysynda senator Aqan Bıjanov Qazaqstanda kremnııdiń jetkilikti ekenin, dál osy shıkizat arqyly kezinde Sıngapýr eli de birshama damyǵanyn aıtyp ótti. Onyń sózine qaraǵanda, kremnıı negizinen kún elektr energııasyn alýda belsendi túrde qoldanylady. «Endeshe perspektıva qaısy? Bul baǵytta arnaıy baǵdarlama, joba bar ma?», - dep surady senator.
Óz kezeginde Áset Isekeshev jańartylatyn balama qýattyń ishinde eń qymbaty kún energııasy ekenin jetkizdi. Sondyqtan da, jaqyn jyldardyń boljamynda Qazaqstanda kún energetıkasyna qaraǵanda jel energetıkasynyń perspektıvasy zor sanalady. «Degenmen, kún energetıkasy baǵytyn damytýdyń ózindik perspektıvasy da joq emes. Jalpy «QazAtomÓnerkásip» AQ arnaıy baǵdarlamasy boıynsha qazaq-frantsýz ǵalymdary birlese otyryp, elektrostansalarǵa arnalǵan kún sáýlesi energııasynyń plıtalaryn ázirlegen bolatyn. Bul qazaqstandyq kremnııden jasaldy. Bul zaýyttyń alǵashqy bóligi byltyr jeltoqsanda Astanada iske qosyldy. Ekinshi bóligi Óskemen qalasynda aǵymdaǵy jyldyń maýsym aıynda iske qosylatyn bolady. Meniń oıymsha, bıylǵy jyldyń ekinshi jartysynda qazaqstandyq kremnııden jasalǵan kún energetıkasy ónimderin shetelge shyǵaratyn bolamyz», - dedi mınıstr.
