Bıyl qazaqstandyq 16 ýnıversıtet QS WUR reıtıngine endi

NUR-SULTAN. QazAqparat - Bıyl álemdik reıtıngke engen qazaqstandyq joǵary oqý oryndarynyń tizimin Almaty tehnologııalyq ýnıversıteti men ıAsaýı atyndaǵy halyqaralyq qazaq-túrik ýnıversıteti tolyqtyrdy, dep habarlaıdy QazAqparat.

«Bıyl qazaqstandyq 16 JOO QS WUR reıtıngine endi, byltyr olardyń sany 14 bolatyn. Al oǵan deıin 8 ýnıversıtet boldy. Jaqynda ýnıversıtetterimiz taǵy bir álemdik Times higher education reıtınginde óz kórsetkishterin aıtarlyqtaı jaqsartty. Bul - eki bedeldi reıtıng. Osynyń barlyǵy qazaqstandyq joǵary bilimniń halyqaralyq deńgeıde tanyla bastaǵanynyń dáleli. Álemdik reıtıngterde kóterilý – qazaqstandyq bilim sapasynyń jaqsarǵanynyń jáne ýnıversıtetterdiń joǵary mártebesiniń aıqyn kórsetkishi. Ýnıversıtetterdi transformatsııalaý, sondaı-aq oqytýshylar men ǵalymdardyń belsendi jumysynyń arqasynda oń nátıjelerge qol jetkizildi», - dedi mınıstrliktiń Joǵary jáne joǵary oqý ornynan keıingi bilim departamentiniń dırektory Gúljan Jarasova.

Otandyq ýnıversıtetter úshin eń basty krıterıılerdiń biri – akademııalyq men jumys berýshiler arasyndaǵy bedel. Sondaı-aq ýnıversıtetterdiń ǵylymı yntymaqtastyq pen jahandyq jetistikteri de atap ótildi.

QS WUR álemniń úzdik ýnıversıtetteriniń tizimi 2004 jyldan beri jarııalanyp keledi.