Bıyl Qazaqstanda JІÓ ósimi 4 paıyz deńgeıinde boljanyp otyr
ASTANA. QazAqparat - 2017 jyldyń qorytyndysy boıynsha Jalpy ishki ónimniń ósimi 4 paıyz deńgeıinde boljanyp otyr. Bul týraly Úkimet otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Jyl qorytyndysy boıynsha JІÓ ósýin 4 paıyz deńgeıde kútýge múmkindik beretin Qazaqstan ekonomıkasy turaqty ósý qarqynyn kórsetýde», - dep atap ótti T. Súleımenov.
Vedomstvo málimetinshe, 2017 jyldyń qańtar-qarashasynda Qazaqstannyń Jalpy ishki óniminiń ósimi 3,9 paıyzdy qurady.
«Negizgi kapıtalǵa salynǵan ınvestıtsııalardyń ósý qarqyny 2016 jylmen salystyrǵanda 2,8 esege jyldamdap, 5,7 paıyzǵa ósti. Jyldyń basynan beri jyldyq ınflıatsııanyń deńgeıi bekitilgen aralyqta, ıaǵnı 6-8 paıyz dálizinde boldy jáne qarashanyń qorytyndysy boıynsha 7,3 paıyzdy qurady.
Ekonomıkany ártaraptandyrý, Aýylónerkásiptik keshendi, kásipkerlikti jáne ınfraqurylymdy damytý, sondaı-aq jumyspen qamtýdy qamtamasyz etý boıynsha baǵdarlamalardy iske asyrýdyń nátıjesinde ekonomıkanyń barlyq salalarynda oń serpin baıqalyp otyr», - dep atap ótti mınıstr.
