Bıyl Qazaqstanda jańaratylatyn energııa kózderiniń 10 nysany iske qosylady
NUR-SULTAN. QazAqparat - Jyl sońyna deıin jańaratylatyn energııa kózderiniń 10 nysany paıdalanýǵa beriledi. Bul týraly Parlament Májilisindegi Úkimet saǵatynda málim boldy, dep habarlaıdy QazAqparat tilshisi.
Belgili bolǵandaı, 2019 jyldyń basynan beri qýaty 147,6 MVt-ny quraǵan jańartylatyn energııa kózderiniń 7 nysany iske qosyldy.
«Osy arqyly, búginde elimizde jalpy qýaty 678,6 MVt-ny qamtyǵan jańartylatyn energııa kózderiniń 74 nysany jumys istep tur. Jyl sońyna deıin 236 MVt qýatymen taǵy da 10 nysandy paıdalanýǵa berý josparlanyp otyr. Sáıkesinshe, bul nysandar sanyn 2020 jyly 95-ke (1483 MVt) jáne 2021 jyly 119-ǵa (2096 MVT) jetkizý josparlanyp otyr», - dedi Energetıka mınıstri Qanat Bozymbaev.
Aıta keteıik, 2018 jyldyń qorytyndysy aıasynda jańartylatyn energııa kózderi boıynsha elimizde 67 nysan boldy, olardyń jalpy qýaty 531 MVt-ny qurady.
Budan buryn habarlanǵandaı, mınıstr 2025 jylǵa deıin elimizde elektr energııasy profıtsıti bolatynyn aıtty.
