Bıyl Qazaqstanda tumaýǵa qarsy reseılik vaktsına egiledi
«Dúnıejúzilik densaýlyq saqtaý uıymynyń málimetine súıensek, bıyl negizinen vırýstyń úsh shtammy taralmaq, ıaǵnı A (H1N1) - Mıchıgan, A (H3N2) - Gonkong, V - Brısben ózekti bolady. Osy oraıda barlyq shtammdar DDSU sertıfıkattaǵan vaktsııanalarda qamtylǵan. Bıyl elimizde Reseıde óndirilgen «Grıppol» ekpesi paıdalanylady, bul vaktsına DDSU tarapynan sertıfıkattalǵan jáne onyń sapasy ulttyq deńgeıde de rastaldy», - dedi QR DSM Qoǵamdyq densaýlyq saqtaý komıtetiniń tóraǵasy Jandarbek Bekshın.
Onyń sózine qaraǵanda, aǵymdaǵy jyly Qazaqstanǵa atalǵan vaktsınanyń 2 mıllıon dozasy jetkizildi, sonyń 1,5 mıllıony 1 mıllıard 200 mıllıon teńge somasynda respýblıkalyq bıýdjet qarjysyna satyp alyndy. Taǵy da 500 myń doza jumys berýshiler men turǵyndar tarapynan jasalǵan ótinim boıynsha tapsyryldy.
Belgili bolǵandaı, memlekettik bıýdjet esebinen vaktsınalaýdan sozylmaly ókpe, júrek-qan tamyry dertimen aýyratyndar, aýrýǵa jıi shaldyǵatyn balalar, medıtsına qyzmetkerleri, ekinshi jáne úshinshi trımestrindegi júkti áıelder ótedi.
«Jaqynda bizdiń halyqtyń ımmýnalogııalyq mártebesine zertteý júrgizdik. Bul turǵyda Qazaqstan halqynyń 20 paıyzynda tumaýdyń atalǵan shtammdaryna ımmýnıtetiniń joqtyǵy anyqtaldy. Sondyqtan vaktsınalaý mańyzdylyǵy baıqalyp otyr», - dedi komıtet basshysy.