Bıyl Qazaqstanda shamamen 17 mln. tonna astyq jınalýy múmkin
Bul týraly búgin Úkimet otyrysynan keıin Ortalyq kommýnıkatsııalar qyzmetindegi brıfıngte QR Aýyl sharýashylyǵy mınıstri Asyljan Mamytbekov málim etti.
Onyń sózine qaraǵanda, búginde jaýyp jatqan jáne boljam boıynsha taıaý kúnderi jaýatyn jańbyr astyq shyǵymdylyǵy úshin óte qajet.
Osy oraıda ol bıyl jyldyq ortasha nemese odan joǵary deńgeıde astyq jınaý josparlanyp otyrǵandyǵyn jetkizdi.
QR AShM baspasóz qyzmetiniń málimetinshe, aǵymdaǵy jyly shamamen 15-17 mln. tonna astyq jınalýy múmkin.
Sonymen qatar A. Mamytbekov eksport kólemi astyq shyǵymdylyǵyna baılanysty ekenin aıta kele, «Bıdaıdy ishki tutyný kólemi 6 mln. tonna, onyń ishinde 2 mln. tonnasy tuqymǵa, taǵy 2 mln. tonnasy azyq-túlik maqsattaryna jáne shamamen 2 mln. tonna tehnologııalyq óńdeýge jáne fýrajdyq maqsattarǵa baǵyttalady. Qalǵan astyqtyq barlyǵyn satylymǵa shyǵaramyz. Al ony tıimdi ótkizý kólemge baılanysty»,-dedi mınıstr.
Bul turǵyda vedomstvo basshysy elimizde astyq shyǵymdylyǵy joǵary bolǵan kezde baǵalardyń tómendeýi jaǵdaıy oryn alǵandyǵyn eske salyp ótti. Osyǵan baılanysty óndirý kólemi men satý múmkindiginiń úılespeýshiligi oryn alǵan edi.
«Búginde biz ártaraptandyrý saıasatyn júzege asyrýdamyz. Bıdaıdyń egis alqaptaryn qysqartý sharalary júrgizilýde. Ol bizdiń ishki tutyný múmkindikteri men satý múmkindikterine baılanysty túzetiledi. Sońǵy jyldary astyq baǵasy burynǵydaı quldyrap jatqan joq. Sonymen qatar vagondar men elevatorlardyń jetispeýshiligi sekildi problemalar kelmeske ketýi tıis»,-dep túıdi A. Mamytbekov.