Bıyl Qazaqstanda satylǵan eski kólikterdiń úlesi qansha
NUR-SULTAN. QazAqparat - 2019 jyldyń 9 aıynda Qazaqstanda 1 093 297 avtokólik tirkeýge qoıyldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Esepti kezeńde ákimshilik polıtsııa organdary 1 093 297 avtokólikti tirkedi. Atalǵan kórsetkish ótken jyldyń sáıkes kezeńinen 12,6 paıyzǵa artyq. Onyń ishinde 1 019 718-i ekinshi ret tirkelgender úlesinde, ıaǵnı bir adamnan ekinshi adamnyń atyna aýystyrylǵan kólikter sanatyna jatqyzyldy. Ósim 2018 jylmen salystyrǵanda 11,9 paıyzǵa jetti. Al alǵash ret tirkelgen kólik quraldarynyń sany 73 579-dy qurady. Ol ótken jylǵyǵa qaraǵanda, 23,3 paıyzǵa joǵary», - dep atap kórsetilgen habarlamada.
Qazaqstanda elektromobılge degen suranys 2,1 esege tómendegen. Bıylǵy qańtar-qyrkúıekte elimiz aýmaǵynda 21 elektromobıl tirkelgen eken.
«QazAvtoÓnerkásiptiń» habarlaýynsha, esepti kezeńde qaıta tirkelgen kólikterdiń úshten ekisiniń astamyn (69,5 paıyzy) paıdalaný merzimi 10 jyldan asqan kólikter qamtyǵan.
Atap aıtqanda, 20 jyldan asqandardyń úlesi 426 959 (41,9 paıyz) bolsa, 11-den 20 jylǵa deıingiler 27,6 paıyzdy (281 257 kólik) qurady. Al 4-ten 7 jylǵa deıin – 209 301 (20,5 paıyz), 8-den 10 jylǵa deıin – 60 874 (6 paıyz), 1-den 3 jylǵa deıingi kólikter sany 35 559-ǵa (3,5 paıyz) jetti. Sonymen qatar, paıdalaný merzimi 1 jylǵa jetpegen kólikterdiń úlesi 0,6 paıyz (5 768 kólik) boldy.
«QazAvtoÓnerkásip» málimetinshe, kelisimshart rásimderine qaraǵanda, otandyq avtoparktiń eskirýiniń úrdisi oryn alǵany baıqalyp otyr.
