Bıyl Qazaqstanda órt saldarynan 223 adam kóz jumdy
ASTANA. QazAqparat - 2016 jyldyń 10 aıynda turǵyn sektorda jeti myńnan astam órt tirkeldi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Jalpy, qutqarýshylardyń jumys salasy ár maýsymǵa bólinedi. Osy maýsymda júrgizilip jatqan sharalardyń mańyzy óte zor. Tótenshe jaǵdaılar komıtetiniń bólimsheleri barlyq profılaktıkalyq sharalardy qabyldap jatyr. Qazirgi kezdegi ózekti problemalar qataryna ýly gaz, órt jáne muz ústindegi qaýipsizdik qaǵıdalaryn saqtamaý enip otyr. Osyndaı qaýipti jaǵdaıǵa eresekter de, balalar da ushyraýy múmkin. Statıstıkalyq málimetterge kóz júgirtsek, 2016 jyldyń 10 aıynda turǵyn sektorda jeti myńnan astam órt oryn aldy, ókinishke qaraı onyń saldarynan 223 adam, sonyń ishinde 29 bala kóz jumdy. 327 adam jaraqat alyp, kúıikke ushyrady, onyń 49-y - balalar. Atap aıtqanda, 657 adam (125 bala) qutqaryldy»,-dedi resmı ókil.
R. Imanqulovtyń sózine qaraǵanda, tek aǵymdaǵy jyldyń 15 qyrkúıeginen bastap turǵyn sektorda ýly gaz ben órtterdiń saldarynan 48 adam kóz jumdy.
