Bıyl Qazaqstanda óndirilgen qant kólemi artady
ASTANA. QazAqparat - 2017 jyly Qazaqstanda óndirilgen otandyq qanttyń kólemi 1,5 esege artady. Bul týraly búgin Úkimet otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.
«Egisterdi ártaraptandyrý sharalary atqaryldy. Osy oraıda suranysqa ıe daqyldardyń egisteri 1 mln. 348 myń gektarǵa artty. Bul turǵyda elimizde qant qyzylshasy nyń egistik kólemi 7 myń gektarǵa nemese 1,5 esege ulǵaıdy. Atalǵan ártaraptandyrý aǵymdaǵy jyly ótken jylmen salystyrǵanda ónim kólemin arttyrýǵa múmkindik beredi. Atap aıtqanda, otandyq qanttyń mólsheri 36 myń tonnadan 54 myń tonnaǵa deıin jetedi»,-dedi Aıtýǵanov.
Úkimet otyrysy barysynda Premer-Mınıstr Baqytjan Saǵyntaev Almaty oblysynyń ákimi Amandyq Batalovtan qant qyzylshasy týraly baıandap berýdi surady.
«Oblysta kóktemgi egis, onyń ishinde qant qyzylshasy boıynsha jumystar tolyǵymen aıaqtaldy. Ótken jyly 6,4 myń gektar bolsa, bıyl 9 myń gektarǵa jettik. Osy baǵytta qajetti tehnıkany satyp aldyq»,-dep toqtaldy ákim.
Onyń sózine qaraǵanda, aǵymdaǵy jyly Kóksý qant zaýyty qant qyzylshasy ónimderin tolyqtaı qabyldaýǵa úlgermeıtinin eskere otyryp, qazirgi kezde ınvestorlardy tartý arqyly Aqsý qant zaýytyn qalpyna keltirip, iske qosý josparlanyp otyr.
