Bıyl Qazaqstanda ońaltý qyzmetteri artady – Alekseı Tsoı

NUR-SULTAN. QazAqparat - Bıyl Qazaqstanda ońaltý qyzmetteriniń sanyn 800 myńǵa deıin artady. Búgin halyq aldynda esep berý kezdesýinde QR Densaýlyq saqtaý mınıstri Alekseı Tsoı osylaı málim etti, dep habarlaıdy QazAqparat tilshisi.

«Elimizde ońaltý qyzmetin damytýǵa erekshe kóńil bólinedi. Respýblıkada 610 medıtsınalyq ońaltý uıymy jumys isteıdi, onyń ishinde memlekettik - 377, jeke – 233, respýblıkalyq – 7. Qazaqstan Respýblıkasynyń Tuńǵysh Prezıdenti qorynyń bastamasymen 8 jańa ońaltý ortalyǵy ashyldy. Qazirgi ýaqytta medıtsınalyq uıymdarda 695 myń múmkindigi shekteýli adam dınamıkalyq baqylaýda tur, onyń ishinde 95 myńy – balalar», - dedi mınıstr Ortalyq kommýnıkatsııalar qyzmetinde.

Onyń aıtýynsha, bul adamdarǵa 2020 jyly 638 myńnan astam medıtsınalyq qyzmet kórsetildi. 2020 jylǵy 1 qańtardan bastap MÁMS júıesin engizýdiń arqasynda ońaltý qyzmetterin qarjylandyrý 2019 jylmen salystyrǵanda 1,2 esege ulǵaıdy jáne 55,7 mlrd teńgeni qurady.

«2021 jyly MÁMS júıesine túsetin túsimder esebinen biz ońaltý qyzmetteriniń sanyn 800 myńǵa jetkizýdi, sondaı-aq osy qyzmetterdi qarjylandyrýdy 62 mlrd teńgege deıin arttyrýdy josparlap otyrmyz», - dedi A. Tsoı.