Bıyl Qazaqstanda munaı óndirý kólemi 75 mln. 770 myń tonna bolady dep boljanýda - B. Sultanov
ASTANA. Qazannyń 28-i. QazAqparat /Qanat Mámetqazyuly/ - 2009 jyly Qazaqstanda munaı óndirý kólemi 75 mln. 770 myń tonna bolady dep boljanýda. Bul týraly búgin Parlament Májilisinde «2009-2011 jyldarǵa arnalǵan respýblıkalyq bıýdjet týraly» zańyna ózgerister men tolyqtyrýlar engizý týraly» zań jobasy boıynsha baıandama jasaǵan QR Ekonomıka jáne bıýdjettik josparlaý mınıstri Baqyt Sultanov málim etti,
dep habarlaıdy QazAqparat.
«Munaı óndirý kólemi 2008 jylǵa qaraǵanda 7,3 paıyzǵa artyp, 75 mln. 770 myń tonna bolady. Sonymen birge, 2009 jyly naqty jalpy ishki ónimniń ósýi 0,1 paıyz deńgeıinde bolady dep kózdelýde. Kóktemde jasalǵan boljammen salystyrǵanda ekonomıkanyń ósý qarqynynyń tómendegeni belgili boldy. Buǵan álemdik daǵdarystyń saldarynan ónerkásip ónimderin óndirý, qurylys nysandary, sondaı-aq qyzmetter kórsetý kóleminiń qysqarýy sebep bolyp otyr», dedi B. Sultanov. Mınıstrdiń aıtýynsha, aǵymdaǵy jylǵy Qazaqstan eksportynyń boljamy shamamen 47,7 mlrd. dollardy qurasa, ımport 34 mlrd. dollar deńgeıinde bolady dep kózdelýde. Bul burynǵy boljamnan 583 mln. dollarǵa tómen.
«2009 jyldyń sońynda ınflıatsııa 8-8,5 paıyz deńgeıinde qalady dep baǵalanýda. Bul osyǵan deıingi boljamnan 2,5-3 paıyzdyq tarmaqqa tómen. Kórsetilgen makroekonomıkalyq deńgeıdegi úrdister memleket kirisiniń deńgeıine ártúrli áser etedi. Bul rette respýblıkalyq bıýdjettiń kiristeri boıynsha 40 mlrd. teńge tolyq túspeıdi degen boljam bar. Atalǵan kiristerdiń ózgerýine birqatar faktorlar áser etedi. Bir jaǵynan ekonomıkalyq damýdyń baıaýlaýy, ımport kóleminiń azaıýy jáne memlekettik resýrstardan, astyq satýdan túsken qarajatty qaıtarýdy uzartý esebinen bıýdjet kiristeri 131 mlrd. teńgege tómendeıdi. Degenmen, bul kórsetkish kiristerdiń 91 mlrd. teńgege ishinara ulǵaıýy esebinen óteledi», dedi mınıstr.
