Bıyl Qazaqstanda mıllıonnan astam adam alǵash ret quqyq buzǵan
ASTANA. QazAqparat - 2015 jyldyń 7 aıynda jańa Ákimshilik kodeksin qoldaný aıasynda 2 465 024 ákimshilik quqyqbuzýshylyq tirkeldi. Bul byltyrǵy osy kezeńmen salystyrǵanda 62,2 paıyz artyq.
«Sondaı-aq usaq quqyqbuzýshylyqtardy anyqtaý da artty, ol ótken jyldyń 7 aıymen salystyrǵanda (729 468) 64,2 paıyz ósip, 1 198 219-dy qurady. Osy jyly mıllıonnan astam adam alǵash ret quqyq buzsa, taǵy da mıllıonǵa jýyq jýyq is qaıtalama belgilerimen rásimdeldi»,- delingen QR Bas prokýratýrasy Quqyqtyq statıstıka jáne arnaıy esepke alý komıtetiniń málimetinde.
Ákimshilik sýbektileriniń praktıkasynda aıyppul salý - 1,5 ese, eskertý - 1,3 ese artyp, sondaı-aq sottar sheteldikterdi ákimshilik jolmen alastatý týraly byltyrǵydan 2,8 ese kóp sheshim shyǵarǵan.
Sonymen birge, ákimshilik qamaýdyń qylmystyq qylyqqa aýystyrylýyna baılanysty oǵan tartylǵan adamdardyń 1,3 ese azaıǵany baıqalady.
Ákimshilik óndiristiń qysqartylǵan tártibiniń, ıaǵnı, quqyq buzǵan adamdardyń óz kinásin bultaryssyz moıyndap, kórsetilgen aıyppul somasynyń 7 táýlik ishinde 50 paıyzyn ǵana tóleýiniń engizilýi memleket qazynasyna 3 mlrd. teńge qosty.
Jalpy 13 mlrd. teńge nemese 38,8 paıyz ákimshilik aıyppul óndirildi.
Sonymen birge, ústimizdegi jyly ótken jylǵa tıesili aıyppul jónindegi 30 myńǵa jýyq qaýlynyń oryndalýy barysynda 3 mlrd. teńge qaıtaryldy.
Jalpy osy ótken kezeńde ákimshilik aıyppuldardy tóleý esebinen memleket bıýdjetine 16 mlrd. astam teńge óndirildi.
