Bıyl Qazaqstanda qyzylshaǵa qatysty 26 oqıǵa tirkelgen
Mınıstrliktiń málimetinshe, Qazaqstanda 2018 jyly qyzylshaǵa qatysty 26 rastalǵan oqıǵa tirkelgen, onyń ishinde 20 jaǵdaı 14 jasqa deıingi balalar (76,9%).
«Almaty qalasynda - 15, Aqmola jáne Jambyl oblystarynda - 2-den, Soltústik Qazaqstan oblysynda - 1, Astana qalasynda - 6 jaǵdaı tirkelgen. Aýrý kóbinese egilmegen balalar arasynda kezdesken. Infektsııa oshaqtarynda qyzylshaǵa qarsy egilmegen balalardy anyqtaýǵa jáne vaktsınatsııalaýǵa baǵyttalǵan epıdemııaǵa qarsy is-sharalar uıymdastyryldy», - delingen habarlamada.
Qyzylsha - dene qyzýynyń kóterilýi, jótel, muryn bitelýi, tamaqtyń aýyrýy jáne bórtpe shyǵatyn vırýstyq tabıǵatty jiti juqpaly aýrý.
Qyzylsha pnevmonııa (ókpeniń qabynýy), bronhıt, entsefalıt (mı qabyǵynyń qabynýy) sııaqty asqynýlar kezinde qaýipti, olar medıtsınalyq kómekke kesh júgingende jáne aýyr qosymsha aýrý bolǵan jaǵdaıda sońy ólimge ákelýi múmkin.
Qyzylshany emdeýdiń tıimdi jáne erekshe ádisi joq. Sondyqtan qyzylshanyń jalǵyz tıimdi qorǵanysy - vaktsınatsııa. Elimizde qyzylshaǵa qarsy egpe eki ret júrgiziledi: birinshisi 1 jasta jáne ekinshisi 6 jasta. Qyzylshaǵa qarsy vaktsınatsııalaý úshin qyzamyq jáne parotıtti komponenttermen biriktirilgen qaýipsiz jáne tıimdi vaktsına qoldanylady.
Dárigerler ata-analarǵa balasynyń qyzylshaǵa qarsy egilgenin tekserýdi, vaktsınatsııa bolmaǵan jaǵdaıda - qyzylshaǵa qarsy profılaktıkalyq egpe alýdy usynady. Sondaı-aq, qyzylshaǵa qarsy ár túrli sebeptermen egilmegen balalardyń ata-analaryna ártúrli mádenı-kópshilik is-sharalarǵa qatysýdy, saýda-oıyn-saýyq ortalyqtaryndaǵy oıyn alańdaryna barýdy shekteý, kataraldy qubylystarmen (dene qyzýynyń joǵarylaýy, bas aýrýy, álsizdik) aýrýdyń alǵashqy belgileri paıda bolǵan kezde dárigerge qaralý, qyzylsha aýrýyna tekserýden ótý jáne onyń barlyq nusqaýlardy oryndaý usynylady.
2017 jyldan bastap Eýrazııa qurylyǵynda qyzylsha boıynsha epıdemıologııalyq jaǵdaı kúrdelendi. Dúnıejúzilik densaýlyq saqtaý uıymynyń (DDU) statıstıkasy boıynsha 2018 jyldyń basynan beri 40 myńnan astam adam qyzylsha juqtyrǵan (DDU 2017 jyly 24 myńnan astam, 2016 jyly 5 myńnan astam qyzylsha faktisin tirkedi).
Bıyl qyzylshanyń epıdqolaısyzdyǵy 7 elde tirkeldi, onda myńnan astam adam qyzylsha aýrýymen aýyrǵan: Ýkraına (38 myńnan astam jaǵdaı), Serbııa (5 myńǵa jýyq jaǵdaı), Frantsııa (2579), Italııa (2020), Reseı (1396), Grýzııa (1128), jáne Grekııa (2476).
DDU sarapshylary aýrýdyń taralýyn qyzylshaǵa qarsy ımmýndaýmen qamtýdyń jáne halyqtyń ımmýndyq qabatynyń tómendeýimen baılanystyrady.