Bıyl Qazaqstanda qurylys normalary men erejeleri joıylady
ASTANA. QazAqparat - Jyl sońyna deıin Qazaqstanda 190-ǵa jýyq qurylys normalary men erejeleri joıylady. Búgin Úkimette ótken baspasóz máslıhatynda QR Investıtsııalar jáne damý birinshi vıtse-mınıstri Alık Aıdarbaev osylaı málim etti, dep habarlaıdy QazAqparat.
«Eýrokodtar úshin jańa normatıvtik baza engizildi, ıaǵnı bul 49- qadamǵa (Ult jospary) qatysty. 2019 jyldyń sońyna deıin osy júıege tolyqtaı kóshý ise asyrylady. Sondaı-aq jyldyń aıaǵyna deıin qurylys máseleleri boıynsha tıisti qurylys normalary men erejeleri joıylady, bul rette onyń 189-y eskerilip otyr. Onyń ornyna qazirgi zamanǵy talaptarǵa saı jańa normalar men erejeler engiziledi»,-dedi Aıdarbaev.
Esterińizge sala keteıik, 49-qadamda keńestik kezeńnen beri qoldanylyp kele jatqan qurylystyń eskirgen normalary men erejeleriniń ornyna eýrokodtar júıesin engizý eskerilgen. Jańa normatıvterdi qabyldaý ınnovatsııalyq tehnologııalar men materıaldardy qoldanýǵa, qurylys qyzmeti naryǵyndaǵy qazaqstandyq mamandardyń básekege qabilettiligin arttyrýǵa, sonymen birge qurylys salasyndaǵy sheteldik qyzmet naryǵyna qazaqstandyq kompanııalardyń shyǵýyna múmkindik beredi.
