Bıyl Qazaqstanda qatarynan 7 jetimder úıi jabylǵan
ASTANA. QazAqparat - 2015 jyly Qazaqstanda qatarynan 7 jetimder úıi jabylǵan. Bul týraly búgin Ortalyq kommýnıkatsııalar qyzmetinde ótken brıfıng barysynda Prezıdent janyndaǵy Otbasy jəne əıelder isteri jónindegi ulttyq komıssııanyń múshesi, «Baýyrjan» qoǵamdyq qaıyrymdylyq qorynyń dırektory Juldyz Omarbekova məlim etti.
Osylaısha, Qazaqstandaǵy balalar úıiniń sany 195-ten 188-ge deıin azaıǵan.
«Bıyl Qazaqstan 7 jetimder úıi jabyldy. 2011 jyly bizdiń qorymyz «Jetim balalarǵa ne kerek?» degen saýalnama júrgizgen. Saýalnama qorytyndysy boıynsha balalarǵa eń keregi - kóńil eken. Ókinishke oraı, jetimder úıinde tərbıeshiler barlyq balaǵa birdeı kóńil bólip úlgermeıdi. Oń men soldy kúnde aıtyp otyratyn adam joq, sebebi,tərbıeshilerdiń ýaqyty joq. Kezinde Darıǵa Nursultanqyzy óte durys aıtty, keńes úkimetinen qalǵan 200-300 oryndyq jetimder úıin jaýyp, olardyń ornyna shaǵyn-shaǵyn otbasylar qurý kerek. Mysaly, Jambyl oblysynda 10 otbasy tıptes úıler ashyldy, Qyzylordada balalar qalashyǵy salyndy»,-deıdi J.Omarbekova.
Qaıyrymdylyq qorynyń basshysy taǵy bir qýantarlyq jańalyq jetkizdi - Qazaqstanda jetim balalardyń sany da azaıyp keledi eken. «Jetim balalardyń sany myń búldirshinge kemidi. Qazir Qazaqstan boıynsha 32 362 jetim bala tirkelgen»,-dep tolyqtyrdy ol.
