Bıyl Qazaqstanda qansha mashına qurastyrylady
ASTANA. QazAqparat - Aǵymdaǵy jyldyń sońyna deıin elimizde 35 myń mashına qurastyrylatyn bolady. Bul týraly búgin Úkimet úıindegi baspasóz máslıhatynda QR Investıtsııalar jáne damý mınıstrligi Indýstrıaldyq damý jáne ónerkásiptik qaýipsizdik komıtetiniń tóraǵasy Almas Batanov aıtty, dep habarlaıdy QazAqparat tilshisi.
«Ótken jyly 19,5 myń avtomobıl shyǵaryldy. Al 2018 jyldyń 4 aıynyń ózinde 9 myń avtomobıl shyǵarylyp otyr. Al bıylǵy jyly otandyq óndirýshilerdiń josparynda shamamen 35 myń kólik shyǵarý bar», - dedi ol.
Onyń dereginshe, ótken jyly Qazaqstanda qurastyrylǵan 1,5 myń avtomobıl Qytaı naryǵyna shyǵarylǵan.
«Qazir eksporttyq áleýetti ulǵaıtý máselesi men yntalandyrý sharalary talqylanyp jatyr. Búginde bul baǵytta Úkimet jumys isteýde. Bizde avtomobıldi biryńǵaı satyp alý uıymdastyrylǵan. Endigi ýaqytta memlekettik organdar avtomobılderdi jeke satyp ala almaıdy. Aldaǵy ýaqytta tek otandyq avomobılderge basymdyq beriletin bolady», - dedi Almas Batanov.
Sonymen qatar ol elimizdegi elektrtehnıkalyq mashına jasaý salasyndaǵy ahýalǵa da toqtaldy.
«Elektrtehnıkalyq mashına jasaýǵa qatysty aıtar bolsam, onda ol óndiristiń turaqty dınamıkasymen sıpattalady. Mashına jasaýdyń basqa salalarymen salystyrǵanda birshama shekteýli. Onyń úlesi 12 paıyzdy quraıdy. Qazirgi ýaqytta sektordyń iri oıynshylary ózderiniń óndiris kólemin arttyra túsýde. Máselen, «Qaınar - AKB» akkýmýlıator jasap, ony eksportqa shyǵaryp jatyr. Alageum Electric AQ transformator shyǵaratyn 4-shi zaýyt salýda jáne óndirisin Soltústik Qazaqstan men elimizden tysqary jerlerde de damytýdy josparlap otyr», - dedi komıtet basshysy.
